LESHELE 36 - Sumi Naga CL (Re-edited) Bible (BSI)

Ow Iqemokeu Kikimiye ye Akughupue

David Le

¹ Axine no kixikilami mlo lo thonhei ishi pisü tsü cheni; pa müzülo Alhou sükümsa kühae.

² Kughengu pa no pa ampi pesü qhemghai kümsü cheni pa xine phuphe mla eno pa ye akimthipu shimo nanie picheni.

³ Pa kichi lono pikeu tsa ye aküküpna eno pishikiqhi; pa ye tsükhüi mlaitha eno akivi shinikeu kühavae.

⁴ Pa lüpa lo akelo pa ye aküküpna kuchughu cheni; pa ye alaghi kivi kumo lo pa ampi kitimepe acheni; pa ye alhoksa milive chemoe.

⁵ O Ampeu, Ow iqemokeu kikimiye ye kungugha kutolo, O pükhükulu ye atsütsü kuto ikuto ani.

⁶ O mikucho ye Alhouw naghutoqo toike; Ow küghakütha ye azüghi kutho toike; O Ampeu, Nono timi eno tüghashi xalue.

⁷ O Alhou, Ow iqemokeu kikimiye ye kishi akughupu kela! Timi jeli no O chishibo qholo ijelue.

⁸ O kilo kupukuno shi akeu lo panongu no aghulhu shi, eno Nono O lokiqipu ghoki lono shophe no panoqo piyeke.

⁹ Kughengu aküxü züpuki ye O lau ani; O küvü lono ningu no aküvü ithulue.

¹⁰ O, No ithi akemi lau Ow iqemokeu kikimiye eno amlo kümzümi lau O mikucho tamono qhitsülo!

¹¹ Aqheküzami pukhu I shou ikughipe kevilo, momu kixikilami u no I hapupove pe kevilo.

¹² Alhoksa shiche kemi hule ikiqi ani; panongu ye jiqhivae, ideithughi lumoae.