LESHELE 35 - Sumi Naga CL (Re-edited) Bible (BSI)

Ampeu ye Kije

David Le

¹ O Ampeu, I sasü kütsala akeqo sasü kütsala lo; khunono I mjochile ani keno pano mjochile lo!

² Azüto eno aghünanu ikhilu lo eno kuphu kepushi ithughi lo!

³ I hakuqo chekemi lachile kepushi angupa ngo aghasü ikhiqhe lulo! I ngulho vilo pilo, “I no ow xakuluu ke!”

⁴ I küxü phu chekemi pelo akukujo eno agigihu küha keu lo ilove pelo! Khunono I shou kixikila kuchughu ani keno pano pelo idechile wove no aghüthi süve pelo!

⁵ Ampeuw kungumi no panoqo hale sawuve kelo panongu ye amülhü no amuu fuleve ketoi pelo!

⁶ Ampeuw kungumi no panoqo hakelo panongu laghi ye zümoi eno phephei nekiphe pelo!

⁷ Kughengu kütsazü shi panongu no I ghenguno alichhe shipeqhi; I ghenguno panongu no kütsazü shi aqo chhue.

⁸ Pa no mtha no akelono kütsakungo pa shou ikughive pelo! Eno pa no alichhe shipüa keu no pa meluve pelo; pa kütsave penike tipau lo ikiqi ilove pelo!

⁹ Tileno I ngulho no Ampeu lau alovi nani, Paw xakulu sheqhe nani.

¹⁰ I ghi kümtsü no pi nani, “O Ampeu, O toi khuu no kumlhomi eno aveküsami pükaqhi chekemi, pano nguno akumtomi launo panoqo xaphe cheni kea?”

¹¹ Xesüxeni thopimi no ithughi; eno I no mtha keu thime panongu no I vilo ighiju.

¹² Panongu no akivi züqhulo alhoksa I tsüchile; I ngulho ye imelhovae.

¹³ Ikemu ni ye, kughou panongu no küsükini shi akeno, I no yeqhiyephi pepuve; I no kükhümzü ni ampi ghime; I no akütsü pishiqhope inikhue.

¹⁴ I no I küsau momu I thiküzüu ghenguno mloqa akeshi; eno milakhi no aza ghenguno mloqa akeshi, I no pishiqhope mloqae.

¹⁵ Ikemu I no küpxalu kelo panongu no I sühope alovi; panongu no aqoshi I lachile; kixikilami I no mtha kemi no tamo mithe I thogha ke;

¹⁶ aghulhu lo shiküpünha küthaküghami toi, panongu no ahu tsüghüpe I tsüe.

¹⁷ O Ampeu, No ye ado khitohi juani kea? Panow kütsakungo keu, eno abongshuu launo I küxü mekusho kuphu tsülo.

¹⁸ Ahoho kije lono I no O shikimthini; aqokitikhi zülono I no O shikimthini.

¹⁹ Khunono akumou lono I ghümi shi ani keno, pano pelo I no tomlave keu lo alovipe kevilo, eno khunono kütsazü shi I mithi ani keno pano pelo anhethi kutuxoxo I jupe kevilo.

²⁰ Kughengu panongu ye külakishi tsa pichemo, ikemu aghakhu lo iqüghai kemi shou pishikiqhi tsa iqiphe cheni.

²¹ Panongu no I lachile pano kichi akuloghi xükho; eno picheni, “Aha, Aha! Ni nhethi no ti ithuluvae!”

²² O Ampeu; Nono ithuluvae, inaqhoive kevilo! O Ampeu, I launo putosü kevilo!

²³ I Lhou eno I Mpeu, I ghenguno ithulo, No ampi haputhu no I saphu tsülo!

²⁴ O chipiu mikucho lono I saphu tsülo, O Ampeu, I Lhou, eno panoqo pelo I shou alovipe kevilo!

²⁵ Panoqo pelo amlo lono ishi pipe kevilo, “Aha, ni mlo lo kümsü pulo ake toivae!” Panoqo pelo ishi pipe kevilo, “Nino pa munovae.”

²⁶ Khunono I mhekiqi lo alovi akeno pano pelo akukujo lo ilove eno aghüthisüve pelo! Khunono I lachile ghi pano ampi sheqhe cheni keno akukujo eno küthakügha phimini pepu pelo!

²⁷ Khunono I chipiu mikucho lo alokiqi shi cheni keno alovi ighamku eno amlo kiqishi tamono ishi pipelo, “Ampeu ye kije ke, Pa ye Pa qeu kivipu ghenguno azüküvü shi cheni!”

²⁸ Tileno I mili no O chipiu mikucho ghili, eno Ow shekiqhe ghili atsala kupuju pini.