LESHELE 34 - Sumi Naga CL (Re-edited) Bible (BSI)

Ampeu ye Alo kepi Ithilo

David Le

¹ Ado kümtsü lo I no Ampeu sheqheni; I kichi lo Pa sheqhe keu ye taveni chemoe.

² I ngulho no Ampeu lau alovi; aqhokighemi pelo chilu no alovi pelo.

³ O! I gholono Ampeu je pikülha lo, eno ningu kümtsa Pa jepipi tsüni nolo!

⁴ I no Ampeu phuighi kelo Pa no I khochile eno I kümsa kümtsü lono I xaphelue.

⁵ Khunono Pa lau jupuku cheni keno pano ye vüqai, eno pano gi ye kujove monani.

⁶ Kumlhomi no ighamku kelo Ampeu no chilutsü eno pa küküpna kümtsü lono xalue.

⁷ Ampeuw kungumi no Pa sümsa chekemi bothape acheni, eno panoqo xaphelu cheni.

⁸ O, Ampeu ye aloke no ampi no michejulo! Pa launo sükusho luche kemi ye alokivipue!

⁹ Ampeu sümsa lo, O nongu Paw timiqo, kughengu Pa sümsa kemi ye kiumu mikheve chemoe!

¹⁰ Abongshuu lhothe ghi achuqupu püqüve no müzüthi cheni; ikemu Ampeu phukemi ye akivi kiumu kühave monani.

¹¹ Ighi lo, O anuliqo, I tsa inilo; I no Ampeu sükümsa nongu shikani.

¹² Khuu no aküxü kimiye cheni eno angukivi tsala kutomo ithuluni shi cheni kea?

¹³ Alhoksa lono nongu mili eno pishikiqhi tsapi lono nongu kichi süchile luvelo.

¹⁴ Alhoksa lono tsüghüve no akivi mlalo; aloinokeu phulo eno ti papelo.

¹⁵ Ampeu nhethi ye amikuchomi shou jupuku cheni eno Pa kini no panoqo ghügha chilu tsü cheni.

¹⁶ Ampeu gi ye alhoksa shikemi lachile cheni, ayeghi lono panongu kümsümave ghi ikhive cheni.

¹⁷ Kughou amikuchomi no kuphu penike ighamku keno, Ampeu no chilu no aküküpna kümtsü lono xaphelu cheni.

¹⁸ Ampeu ye amlo itamjui akemi kupunu ani eno aghungu lo chishedape akemi xalu cheni.

¹⁹ Amikuchomi ghime kitikhi ye kutomoe, ikemu Ampeu no ti kümtsü lono pa xaphelu cheni.

²⁰ Pa no pa ghi kümtsü süshotsü cheni; tipaqo lakhimu ipove chemoe.

²¹ Alhoksa no kixikilami ghiqhive nani, eno amikuchomi mithi chekemi ye kileve nani.

²² Ampeu no Pa qemi küxü qhüchile luve nani; Pa lau sükusho luche kemi khumu kileve monani.