LESHELE 33 - Sumi Naga CL (Re-edited) Bible (BSI)

Ampeu w Iqemokeu Kikimiye

¹ Ampeu lau alovi ighamku lo, O nongu amikuchomi! Akümzümi shekiqhe ye aküzüpue.

² Aheo pesü Ampeu shikimthi lo; akighi-chighi lebo pesü Pa lau alekungo phelo!

³ Asütsa kuloghi lono akighilebo küigha ale kithe Pa lau phelo.

⁴ Kughengu Ampeu tsa ye kuchou, eno Pa kümla kümtsü pükhükulu lono mlae.

⁵ Pa ye achipiu mikucho eno kuchou xakütha kimiye cheni; Ampeuw iqemokeu kikimiye no ayeghi chhi ani.

⁶ Ampeu tsa no kungugha lhoe, eno Pa kichi lo tuthukishe no yepu yesüqo lhoe.

⁷ Amoqhe puku püake toi Pa no azüghi lo azü hekütsü; Pa no azüghi kutho pekütsüpe qhie.

⁸ Ayeghi kümtsü no Ampeu sümsa lo; ayeghi lo xüküami Pa zülo khokhoshi puthugho lo!

⁹ Kughengu Pa no atsa pi kelo shikupuve; pa no azah tsükelo ti ye akumtoshi puthughove.

¹⁰ Shiyeqow kichekütsü Ampeu no adou shive tsüe; pa no timi kukughu hexave tsü.

¹¹ Ampeuw kichekütsü ye alhokupuju acheni, Pa kukughu ye tiqheli kümtsü lo acheni.

¹² Khuno shiye Lhou no Ampeu keno alokivipue, Pa no khuno pesü Pa mheghi shi kisheve akeno alokivipue!

¹³ Ampeu no kungugha lono jupiqi ani; Pa no timi nuli kümtsü ithulu cheni;

¹⁴ Pa kükalakhü khile Pa no iqa ani keno tileno Pa no ayeghi lo küxümi kümtsü jucheni,

¹⁵ pano kükümsü kümtsü kutotsü chekeu huno pano kümla kümtsü jukuto cheni.

¹⁶ Akükau ye paw ghüshimi kutomo akeu vecheo xalu chemoe; aghütomi ye pa küka kije vecheo süsholu chemoe.

¹⁷ Aghüshi khurshi no xalu nani pikeu ye kichile lajupue, tipau kumto ye kuphu mla nani.

¹⁸ Julo, Ampeu nhethi ye khunono Pa sümsa cheni keno, Paw iqemokeu kikimiye shou pükhü chekemi shou acheni,

¹⁹ tishikeu lono Pa no akithi lono pano ngulho xaphelu eno püqümiye ighi kelo panoqo püxülu cheni.

²⁰ Ni ngulho no Ampeu khe ani; Pa ye ni kukuphuu eno ni züto.

²¹ Kughengu ningu mlo ye Pa lau no alovi acheni, kughengu ningu no Pa kimthe je shou pükhü cheni.

²² O Ampeu, Ow iqemokeu kikimiye ni shou alo, ningu no O shou pükhü achenie.