LESHELE 32 - Sumi Naga CL (Re-edited) Bible (BSI)

Axine Pevetsü kemi Kümghapue

David Le

¹ Khuno kipimi qhive tsü akeno, khuno xine jonhave tsü akeno pa ye akümghapue.

² Ampeu no khuno kipimi kihi tsümoni, khuno lolo pishikiqhi küha keno pa ye akümghapue.

³ Kughou I no iqünhei ngove keno, atsala kupuju aghime lono I ghi ye thizümüive ke.

⁴ Kughengu putho pucho I shou O u mishishei ikughi; mütsü lo khetsünhe no pügha pühave ketoi I küka ye qhaivae.

⁵ I no I xine O lau pipheve eno I kipimi küsümoe; I no pi, “I kipimi Ampeu lau pipheni,” eno Nono I xine kipimi qhivetsü.

⁶ Tighenguno O phulu kepu do-ghuloki lono Alhou ithi kemi kümtsü no akighini lono O lau ighilu pelo; mtsüqheino lakhamla keu zü kije qoighi kelo tino pa tomo nani.

⁷ No ye I ghenguno aküghütshü-a ke; Nono aküküpna lono I peküsüe; Nono xakulu lekungo pesü I botha ke.

⁸ Nono wu masa keu laghi lo I no o kütsü shika nani; I nhethi pesü o shou jupuku no I no o vilo piputoni.

⁹ Khurshi momu khurgha vethakulu küha keqo toi kevilo, tipaqo ye ivünhei peniye akichi küptapu ngo akighi no tsüghape acheni, tishimo aye o kupunu ngomo ake.

¹⁰ Kixikilami ghime ye kutomoe, ikemu iqemokeu kikimiye no Ampeu pükhübe kemi bothape acheni.

¹¹ O amikuchomi, Ampeu lau alokiqi shino alovilo, eno nongu amlo kümzümiqo, alovi ighamku lo.