LESHELE 31 - Sumi Naga CL (Re-edited) Bible (BSI)

O u lo I Ghungu Kulhuqhi ani

Davidw Leshele

¹ O Ampeu, ni ye O launo sükusho ithulu cheni; I pelo khilemu akukujo lo ilovepe kevilo; O mikucho lono I xaphe tsülo!

² I lau O kini kugho puwo tsülo; Mtazü I kuphu tsülo! I ghenguno sükusho tuqu shilo, I xalu kepu liwo kumto shilo!

³ Kughengu No ye I tuqu eno I sükusho liwoke; O je lono I sache lo eno I laghi kichepiye tsülo;

⁴ I ghenguno alichhe shipe küsü püakeu lono Nono I xaphelue, kughengu No ye Iw sükusho ke.

⁵ I ghungu pesü I no O u lo kulhuqhi tsü ani; Nono I qhüchile luvae, O Ampeu, pükhükulupu Lhou.

⁶ Khunono ameküküha julho mlla cheni keno I no mithie, ikemu ni ye Ampeu pükhü cheni.

⁷ Ow iqemokeu kikimiye lo ni ye alokivi eno amlokiqi shi nani, kughengu Nono I kijiküsa ithuluvae; Nono I ngulho ghime kitikhi ithi ani,

⁸ eno No ye aghümi u lo I phesüve mphi; Nono I pukhu pesü ililai ke-a lo ghope qhitsüe.

⁹ O Ampeu, I küpüqhiyi tsülo, kughengu ni ye shilusa ani; I nhethi, I ngulho eno I phimpi ghi amloghuju lono aküka kühavae.

¹⁰ Kughengu I küxü ye amlo ghime lono puwovae, eno I mpe ye amlo ghime tuthukishe lono puwovae; I xine ghenguno I küka ye tomlavae, eno I ghi ye aküka kühavae.

¹¹ I ghümi eno akhoto no I kisüghümi ghenguno ni ye thoküghapu shivae, eno I juthimi zülo akümsapu thime shivae; khunono alaghi lo ni ithulu keno I launo pove ani.

¹² Kithimi toi I kümsümavae; ni ye ali kughupo toivae.

¹³ Kughengu kutomo no chhuchhushi küptsa keu I no chilue— kichi kümsa keu no akuaqha kümtsü lo ani!— panongu no I shou kuchughu ani, I küxü luve tsüniye küsüqe ani.

¹⁴ Ikemu ni ye O pükhü ani, O Ampeu; I no pi, “No ye I Lhou ke.”

¹⁵ I do-ghuloki ye O u lo ani; I ghümi eno I pishipuju kemi u lono I xalu tsülo!

¹⁶ O qeu lau O gi yepüvü tsülo; Ow iqemokeu kikimiye vecheo I xalu tsülo!

¹⁷ O Ampeu, I pelo akukujo lo ilope kevilo, kughengu I no O vilo khu ani; küsaküghami pelo akukujo lo ilove pelo; pano pelo iqüghai Kithigha lo wuve pelo.

¹⁸ Kimkimi kichi no jukünatha ghi amikuchomi thogha eno aqheküza shi atsa pichekeu pimlave pelo.

¹⁹ O, O sümsa chekemi ghenguno khikhi akivi Nono pekütsü püani keno, O launo sükusho luche kemi ghenguno mla püakeu ye timi zülo kishi kupukuno shi ani kelae!

²⁰ Timiqo no küsüqe akeu lono Nono panoqo pesü O chishibo qholo küghütshüve, kütsala kighe akeqo kichi launo Nono panoqo pesü Ow sükusho qholo küghütshüe.

²¹ Ampeu sheqhelo, kughengu khasüve keu mishighüna lo I no akelo Pa no akümzapu shi Paw iqemokeu kikimiye I lau pephe piye.

²² I kichiqhi kelau no I no pi, “Ni ye O zülono hapheve kemie.” Ikemu kughou I no akukuphu ghenguno O lau ighamku keno küpüqhiyi tsü penike I no qhüiniju keu sütsa Nono chilu tsüe.

²³ Ampeu kimiye lo, nongu Paw timiqo! Pükhükulumi ye Ampeu no khe acheni ikemu aqheküza lono mla chekemi ye mishishei ghime cheni.

²⁴ Nongu Ampeu ngokhe chekemi kümtsü no mtotoi lo, nongu mlo mtolu lo.