LESHELE 30 - Sumi Naga CL (Re-edited) Bible (BSI)

Inaqhe lo Alokivi Ighi cheni

Davidw Leshele: Achineki Ikhiphekütsü Le

¹ I no O sheqheni, O Ampeu, kughengu Nono I sünhephe eno I ghümi pelo I shou alovi pemoe.

² O Ampeu I Lhou, kuphu penike I no O lau ighamkue, eno Nono I shipivive tsüae.

³ O Ampeu, Nono Kithigha lono I saipeghi; aqo lo ikiqi ilove keqo gholono Nono I küxü athoputho tsüe.

⁴ O nongu Pa küpülümi, Ampeu lau shekiqhe le phelo, eno shikimthi keu pesü Pa je kimthe tsülo.

⁵ Kughengu Pa loghu ye ado ikhonhei ghenguno, eno Pa mlokiqi ye aküxü tivilo ke. Putho lo anhezü piji aghiluvi, ikemu inaqhe no alokivi ighi cheni.

⁶ I no kinikülüshi akelo ishi pi, “Ni ye khilemu ithamo nani.”

⁷ O Ampeu, O mlo kiqishi Nono Iw naghuto pesü mtotoi shitsü; Nono O gi küsüve kelo; Ni ye aghüthi süve.

⁸ O Ampeu, I no O lau ighamku ani, eno kimiyeqhiyi tsü penike I no qhüiniju ani.

⁹ “I no aqo lo ikiqi ilove aye, I kithi ye kiu ala shini kea? Ayeghimkhu ye O sheqhe nanio? Ti ye O pükhükulu ghili pi nani keshea?

¹⁰ Inilo, O Ampeu, eno I kimiyekütü tsülo! O Ampeu, I kukuphuu shi tsülo!”

¹¹ Nono I mloghime pesü alokivi kighilhe shive tsüe; Nono Iw yeqhiyephi ikhiluve tsü, eno alokivi pesü I puuke,

¹² tishino I juküvü no O sheqhe eno inaqhoive pemoe. O Ampeu I Lhou, ni ye alhokuthu shikimthi keu O tsü nani!