LESHELE 28 - Sumi Naga CL (Re-edited) Bible (BSI)

Ampeu no I Kumto eno I Züto

David Le

¹ O Ampeu, I no O ku ani; I tuqu, I launo akini ipove kevilo, Nono I lau inaqhoive aye, ni ye aqo lo ikiqi ilove kemi toive nani.

² Kughou I no kuphu penike O lau ighamkuni keno, I no shishe O kimthe-a küdau I u peqhe eno kimiye tsü penike qhüiniju kelo chilu tsülo.

³ Alhoksa eno kixikila kümla shiche kemi khunono amlo lo kixikila xapu, ikemu akisüghümi lau ye külakishi tsa picheni keno pano gholono I sünhe sawuve kevilo.

⁴ Pano kümla eno pano kixikila kümla kiqi lono lochile lo; pano u no mlakeu kiqi lono tsüchile lo; panongu no ithulu küzüpu pesü pano saxü shitsü lo.

⁵ Kughengu panongu no Ampeu kümla momu Pa u no mlakeu gihu chemoe, Pa no panoqo xaleqhive nani eno shiqhe kithemo nani.

⁶ Ampeu sheqhelo! Kughengu I no küpüqhiyi tsü penike inikhu keu sütsa Pa no chiluve tsüae.

⁷ Ampeu ye I kumto eno I züto ke; I mlo no Pa pükhü ani, eno ni ye akukuphu ithuluvae; I mlo lono aloviqhiyi ani, eno I le kungo pesü Pa shikimthi ani.

⁸ Ampeu ye Paw timi kumtopu ke; Pa no nukishe luve keu xakuluu sükusho ke.

⁹ O, Ow timiqo xalu tsülo eno O mheghi kümgha tsülo! Panoqo kheu shino alhokupuju hiju tsülo.