LESHELE 27 - Sumi Naga CL (Re-edited) Bible (BSI)

Ampeu ye I küvü eno I Xakuluu.

David Le

¹ Ampeu no I küvü eno I xakuluu; ni ye khuu msaighüni kea? Ampeu no I küxü lo sükusho-a ke; ni ye khuu msani kea?

² Kughou kixikila shiche kemi no I ghüza niye I haqhini keno, I külami eno I ghümiu no küpxape veqhive cheni.

³ Ghüshimi no I botha luve namu, I mlo ye msave monani, I mjochile aghüshi ipeghive namu ni ye mtotoi anani.

⁴ Thime lakhi I no Ampeu vilo khu ani, ti likhi I no phunani; ti ye I küxü kupuju lo Ampeu kilo acheni keu, Ampeu jukivi shou jupuku eno Pa chineki lono Pa pulou ighijuni keu ke.

⁵ Kughengu aküküpna tsala lo Pa no Pa kicheqho lo I küghütshü nani; Pa no Pa phiki qholo I peküsü nani; Pa no atuqu shou qhemghai I süqhe nani.

⁶ Itehi ye I ghümi I homxape akemi kümtsü shou I kütsü peqhe nani, I no Pa phiki lo ilo no alokivi shi ighamku aghakishi tsü nani; I no ale kungo pesü Ampeu lau shipili nani.

⁷ Kughou I no ighamkuni keno ini tsülo O Ampeu; I küpüqhiyi shi khochile tsülo!

⁸ Nono pi, “I phuighi lo.” I mlo no O vilo piani, “I no O phuighi ani, Ampeu.”

⁹ I launo O gi küsüve kevilo. O No khuu I kuphu ighive akeno aloghu lono O qeu hachile puwove tsü kevilo. O I xakulu Lhou, I haphe kevilo; I pheve tsü kevilo.

¹⁰ Kughengu I pu ngo I za ye I qhivae, ikemu Ampeu no I saluve nani.

¹¹ O laghi I shika tsülo, O Ampeu, eno müdüniyi keu laghi lo I sawulo kughengu I ghümi kutomo ani.

¹² I ghümi pulou lo I phesüve tsü kevilo; kughengu kichile thopimi no I shou ithughivae, eno panongu ye ngukangugha tuthu shephe ani.

¹³ I no pülü ani, ni ye küxümi yeghi lo Ampeu kivi ithulu nani!

¹⁴ Ampeu ngokhe lo; akumto shilo, eno o mlo mtotoi lo; Ampeu ngo khelo!