LESHELE 26 - Sumi Naga CL (Re-edited) Bible (BSI)

I no Ampeu Sheqheni

David Le

¹ I chipiu saphu tsülo, O Ampeu, kughengu ni ye akikhi lono checheni, eno ni ye lhelhei mono Ampeu lau pükhübe ighivae.

² I phuju lo, O Ampeu, eno I pejulo; I mlo eno I kükümsü pejulo.

³ Kughengu Ow iqemokeu kikimiye ye I zülo ani, eno Ow pükhükulu lono ni ye checheni.

⁴ Ni ye kichile timiqo sasü iqa chemoe, momu keghilishi kemi sasü kümtsa chemoe.

⁵ Kixikila shiche kemi hoho ye I no mithi, ni ye küsaküghami sasü iqa monani.

⁶ O Ampeu, ni ye akipimi küküha michishi I u mütsüve no O kümlla khache homxa ghi,

⁷ asütsa kije lono shikimthikütsü sheshu ani, eno Ow kümzapu kümla kümtsü pitsü ani.

⁸ O Ampeu, ni ye O kungoki kimiye cheni, eno O juküvü no khile ani keno ti kimiye cheni.

⁹ Axinemi eno ajiküxümi gholono I küxü pühave tsü kevilo,

¹⁰ pano u lo kixikila kukughu ani eno pano u ajeu külügho no chhitoi ani.

¹¹ Ikemu I ghengu ye, ni ye I kikhi lono cheche nani; I qhüchile tsülo, eno I lau küpüqhiyi tsülo.

¹² I pukhu ye mtotoi puthugho ani; ahoho kije lono I no Ampeu sheqhe nani.