LESHELE 25 - Sumi Naga CL (Re-edited) Bible (BSI)

O Laghi I Shikalo

David Le

¹ O Ampeu, I no O lau I ngulho süqhe ani.

² O I Lhou, I no O pükhübe ani; I pelo akukujo lo ilovepe kevilo; I ghümi pelo I shou tolupe kevilo.

³ Mtsüqheino O ngokhe chekemi ye akukujo lo ilove monani; Akiqi kühano pishiqhi kemi ye akukujo lo ilove nani.

⁴ I pelo O laghi ithilu pelo, O Ampeu; O laghiqo I shika tsülo.

⁵ O chipiu pesü I shika eno I sachelo, kughengu No ye I xakuluu Lhou ke; atsala kupuju ni ye O ngokhe anie.

⁶ Ow kimiyekini eno iqemokeu kikimiye kümsü lulo O Ampeu, kughengu tipaqo ye khaghi no tishi cheghi ke.

⁷ I lhothe lo xine eno hekibide kümsülu tsü kevilo; Ow Iqemokeu kikimiye vecheo, eno O je kivi vecheo I kümsüchile tsülo, O Ampeu!

⁸ Ampeu ye akivi eno achipiu; tighenguno Pa no axinemi lau Pa laghi kütsüshika cheni.

⁹ Pa no aqhokighemi sasü achipiu lo wucheni eno aqhokighemi lau Pa laghi shika cheni.

¹⁰ Ampeuw puloshoqhi eno Pa shepe papelu kemi laghi ye iqemokeu kikimiye eno pükhükulu ke.

¹¹ O Ampeu, O je lono I kipimi qhive tsülo, kughengu I kipimi ye kije ke.

¹² Khuu no Ampeu sümsa cheni kea? Pa no wukepu laghi ye Ampeu no kishetsü nani.

¹³ Pa ngulho ye akivishi anani, eno pa tikughukomi no amheghi shi ayeghi ighilu nani.

¹⁴ Ampeu ye Pa sümsa chekemi sasü shou-pau shicheni, eno Paw puloshoqhi pesü panoqo pelo ithipe cheni.

¹⁵ I nhethi ye alhokuthu Ampeu küdau jupuwu cheni, kughengu Pa no alichhe lono I pukhu sünhephe tsü nani.

¹⁶ I lau tsüghü ighilo eno I lau küpüqhiyi tsülo, kughengu ni ye I likhivae eno aghime shi ani.

¹⁷ I mlo lo aküküpna alau kije shivae; I ghime kitikhi lono I saipeghi tsülo.

¹⁸ I ghime eno I küküpna kümsüju tsülo, eno I xine kümtsü qhive tsülo.

¹⁹ I ghümi khijejehi ani, eno kishi ngukangugha kimthipu lono I mithi cheni keno kümsüju tsülo.

²⁰ O, I ngulho khekuto tsülo, eno I xaphe tsülo. I pelo akukujo lo ilope kevilo, kughengu O launo I no sükusho lucheni.

²¹ Akikhi eno achipiu pesü I küxü süshope qhitsülo kughengu ni ye O ngokhe ani.

²² O Alhou, aghime kümtsü lono Israel xaphe tsülo.