LESHELE 24 - Sumi Naga CL (Re-edited) Bible (BSI)

Ajuküvü Kükau

Davidw Leshele

¹ Ayeghi eno tipau lo akeu kümtsü Ampeuw ke, ayeghiqha eno tile küxümi ghi Paw ke,

² kughengu Pa no azü kutho shou tipau ghope qhike, eno azüghi shou tipau boqha qhape qhike.

³ Khuu no Ampeuw naghuto lo ikuluni kea? Khuu no Pa kimthe-a lo puthugho luni kea?

⁴ Khuu no au mithe eno amlo tsüghükhüi ani, khuu no kichile lau pa küxü pephetsü chemo eno pishikiqhi shoqhi shichemo keno pa no tishilu nani.

⁵ Pa ye Ampeu launo kükümgha eno Alhou pa xakuluu launo achipiu mikucho ithulu nani.

⁶ Titoi kemi tiqhelimi no Pa phuighi cheni eno Jacob Lhou gi phuighi cheni.

⁷ O khaghoqo, nongu kütsü peqhelo! O mulho hukikhaqo, nongu kütsü peqhelo, ajuküvü kükau no iloghi pelo.

⁸ Ajuküvü kükau ye khuu kea? Ampeu, akumtou eno akughushuu, Ampeu, aghüshi lo akumtou ke!

⁹ O khaghaqo, nongu kütsü peqhelo! O mulho hukikhaqo, nongu kütsü peqhelo! Ajuküvü kükau no iloghi pelo.

¹⁰ Ajuküvü kükau ye khuu kea? Aqokitikhi Mpeu, Pa ye ajuküvü kükau ke!