LESHELE 22 - Sumi Naga CL (Re-edited) Bible (BSI)

Kushiye I qhive ani kea?

Davidw Leshele

¹ I Lhou, I Lhou, No ye kushiye I qhive akea? Kushiye I xaluni keu, I ghime lono putosüve ani kea?

² O I Lhou, I no puchou no ighamku kemu Nono I khochile moe, I no putho lono ighamku kemu ni ye akulhoqhi mlae.

³ Ikemu No ye akimthe ke, Israelmi no sheqhe chekeu kükalakhü lo ani.

⁴ Ni puasüqo no O shou pükhübe; panongu no O pükhü, eno Nono panoqo xaphelue.

⁵ Panongu no O lau igha ighi eno Nono panongu xaphe; panongu no O pükhü, eno Nono panongu pelo kujove pemoe.

⁶ Ikemu ni ye pithe-ninga lakhi thono timi kumoe, timi jeli no I junuqhi eno timiqo no I jukünathae.

⁷ I ju ithulu kemi kümtsü no I junue; panongu no amtsü yelepe I tsü; akütsü küngü tsü;

⁸ “Pa ye Ampeu pükhübe ani; Pa pelo xaphe pelo; Pa pelo kuphu pelo, kughengu pa no Pa lau azüküvü acheni!”

⁹ Ikemu atita lo akelono ni ikhiphelu keu huye No ke; I za mla lo khape ake lono Nono I pelo O pükhübe lupe.

¹⁰ I punu kelono I no O lau pükhübe, eno I za tita lo akelono No ye I Lhou shi ighivae.

¹¹ I lau no putosüve kevilo, kughengu aveküsa ye aphivilo ani, eno kuphuni kemi khumu kühae.

¹² Amshitsü kutomo no I sühope ani; Bashan mishitsü kumto no I vehope ani;

¹³ abongshuu no mqhumza eno ighamku aketoi panongu no I lau abaxa akuloghi mukupe ani.

¹⁴ Azü toi ni ye ayeghi lo leqhivae eno I ghi kümtsü süküqüpe ani; I mlo ye aghügha toivae; I mla dolono mlaghubeivae;

¹⁵ I kumto ye alitsa toi qhaivae, eno I mili ye I mükhüghi lo meda luvae; Nono akithi yeghimkhu lo I qhive ke.

¹⁶ Kughengu atsüqo no I sühope ani; küsakügha kümlami loji no I botha luvae; panongu no I u eno I pukhu qhuqhive tsüae—

¹⁷ Ni ye I ghi kümtsü kihilu nani— panongu no I ju eno I no tomlave keu lo alovi ke;

¹⁸ panongu no pano dolono I phimini kijeluve, eno I kuuphi ghenguno panongu no asaqhi ke.

¹⁹ Ikemu, O Ampeu, No ye putosüve kevilo! O! No I kukuphuu, I saphu kepu shi mtazü ighilo!

²⁰ Azütakikihi lono I ngulho xaphe tsülo, atsü kumto launo I küxü mekusho xaphe tsülo!

²¹ Abongshuu kichi lono I xaphe tsülo! Nono aviala kibo launo I xalue!

²² I no O je pesü I thiküzümi vilo pini; aqoaho lono I no O sheqheni:

²³ Nongu Ampeu sümsa chekemi, Pa sheqhelo! Nongu Jacob kughukomi kümtsü Pa jepipi tsülo, nongu Israel kughukomi kümtsü Pa sükümsa shi puthugho lo!

²⁴ Kughengu Pa ye aghime lo akemi ghime jukünatha momu jupe aphimqhüve chemoe, pa lau no Pa gi küsüve chemoe, ikemu pa no ighamku khu kelo chilu tsüe.

²⁵ Ahoho kije lo Iw shekiqhe ye O launo ighie; Pa sümsa chekemi zülono I no I shoqhi shikupuni.

²⁶ Aghime kitikhi lo akemi no chulu nani eno aghapiqilu nani; khunono Pa phucheni keno pano no Ampeu sheqhe nani! Nongu mlo alholo xü apeniu!

²⁷ Ashiaye kümtsü no kümsülu eno Ampeu lau xaidelo, shiye jeli kümtsü no O zülono O mlla nani.

²⁸ Kughengu aküka ye Ampeuw ke, Pa no shiyeqo shou ayepe ani.

²⁹ Ayeghi lo kinimi kümtsü no chusho no mllae; ayeghimkhu shive kemi kümtsü, pa ampi püxü mlave kemi ghi Pa zülo itsaqi nani.

³⁰ Tiqhelimi no Pa qe nani; Ampeu ghili ighini keu tiqhelimi vilo pi nani;

³¹ Panongu no ighi no Pa chipiu mikucho pesü timi punu niye akeqo vilo sheshu nani, kughengu Pa no hipau shive tsüae.