LESHELE 21 - Sumi Naga CL (Re-edited) Bible (BSI)

Tokulu Shekiqhe

Davidw Leshele

¹ O Ampeu, akükau no O kumto lo alovi ani, eno Ow xakulu lo pa no kishi alovishe ani kela!

² Pa no kümsü pulo akeu Nono tsüvae eno pa no qhüiniju khukeu süchileve moe.

³ Kughengu Nono kinikülü kükümgha pesü pa sasü kusho; Nono ameshoyi akiviu kütsükuqho pesü pa kütsü qhotsü.

⁴ Pa no O vilo aküxü khue; Nono tipau pesü pa tsü, alhokupuju axüpushu tsüe.

⁵ Ow xakulu vecheo pa juküvü ye ighono kije shive; qhivütsünyi keu ngo akükanguagha Nono pa shou betsüe.

⁶ Kughengu Nono pa pesü alholo shishe akümghau shitsü; Nono ighikeu lokivi no pa pelo alovi lupe.

⁷ Kughengu akükau no Ampeu shou pükhübe ani, Shishe Akiqheuw iqemokeu kikimiye vecheo pa ye ithamo nani.

⁸ O u no o ghümi kümtsü küghaluve nani; khunono o mithi cheni keno O u ajeu no küghaluve nani.

⁹ Kughou Nono ipeghi keno panoqo pesü amiphoki miküqü toi shitsü nani. Ampeu no Pa loghu lono panoqo pühave eno ami no panoqo pitive.

¹⁰ Nono ayeghi lo timiqo gholono pano lagha eno atikughuko kütsave nani.

¹¹ Panongu no o shou alhoksa kuchughu namu pishikiqhi kuchughu aghi namu tokulu shimo nani.

¹² Kughengu Nono panoqo hapupove nani; Nono O piji pesü panoqo gi lo mijipe ngoluve nani.

¹³ O Ampeu, O kumto lono O süqhelo! Nino O küka shipili eno sheqheni.