LESHELE 20 - Sumi Naga CL (Re-edited) Bible (BSI)

Ampeu Ni Lhou Je Pükhübe lo

Davidw Leshele.

¹ Ampeu no o veküsa tsala lo o khochile tsü peniu! Jacob Lhou je no o süsho peniu!

² Akimthe-a lono Pa no akukuphu o tsüpuwu no Zion lono sakuphu o tsü peniu!

³ O kümllagho kümtsü Pa no kümsülu eno agigihu lono o kipti kümllagho ikhilutsü peniu!

⁴ O mlo no kümsü pulo keu Pa no o tsü peni eno o kukughu kümtsü shikupu tsü peni!

⁵ Ningu no ow tokulu lo alovi ighani, eno ni Lhou je lono niw michiphi süqheni! Ampeu pelo nongu no qhüiniju keu shikupu tsü peniu!

⁶ I no ithive ake Ampeu no nukishe luve kemi xalu cheni; Pa u ajeu kumto pesü Paw kungugha kimthe lono khochile nani.

⁷ Khami no khurkulu eno khami no khurshi shou pükhübe cheni, ikemu ningu ye Ampeu ni Lhou shou pükhü cheni.

⁸ Tipaqo ye veqhive eno ikiqive, ikemu ningu ye ithughi no mtotoi puthugho luve nani.

⁹ O Ampeu, akükau xalulo! Nino kukelo khochile tsülo.