LESHELE 19 - Sumi Naga CL (Re-edited) Bible (BSI)

Ampeu Yezah ye Kupukülai

Davidw Leshele.

¹ Kungugha no Alhou juküvü shuphe ani, eno atsütsü no Pa u lo kümla sheshu ani.

² Tsalakipe piputo keu tsa sheshu ani, eno putho atsütsü akighithi pephe anie.

³ Khuno tsapi momu khuno tsa lomu tipaqo sütsa chimla keu kühae.

⁴ Pano sütsa no ayeghi kümtsü vekipighi, ayeghi shekichi kutolo wu cheni. Pa no khetsünhe ghenguno atsütsü lo aphiki shipüani,

⁵ ti ye külapuu no pa chebo lono ipeghi aketoi, akumtomi no alokivi shi pa kupo lo toluve ketoi ke.

⁶ Tino atsütsü shekichi lono ipeghi cheni, eno tipa shekichi kutolo homxa cheni, eno kiumu tipau külü launo itshüve mlae.

⁷ Ampeu yezah ye kupukülai, angulho püxü kithetsü cheni; Ampeuw thopi ye mtsüqhei, azükütütüi kemi pelo alotsü lupe cheni;

⁸ Ampeu no shilo pikeu yezah ye achipi, amlo pelo alovi lupe cheni; Ampeu zakütsü ye mqhamqhi, anhethi shikütsüghü tsücheni;

⁹ Ampeu sümsa keu ye mithe mithei, alhokupuju ache nani; Ampeu yezah ye kuchou, eno thokha lo achipiue.

¹⁰ Ameshoyi nguno alau, ameshoyi kütsüghü nguno alau tipaqou lunishi qhiyi kepue; akhingozü eno akhilha lono ijiqighi keu nguno alau akungoue.

¹¹ Tinguno alau, tipaqo vecheo O qemi ghutulu cheni; ti papelu keu lo asaxü kije ani.

¹² Khuu no alikhi akipimi phulu nani kea? Tuqho-tugho kipimi lono I xaphe lulo.

¹³ Kümsükuju xine lono O qeu sünhe chile lulo; tipaqo pelo I qhasü luvepe kevilo! Tishiaye ni ye tichetighe küha nani, eno axine kije lono akipimi küha nani.

¹⁴ I kichi lono piqhikeu tsa eno I mlo lo kümsükutho keu O zülo ikhikulupu shipelo, O Ampeu, I tuqu eno I xachilekuluu.