LESHELE 18 - Sumi Naga CL (Re-edited) Bible (BSI)

Ampeu ye I Tuqu eno I Liwo

Davidw Leshele

¹ O Ampeu, I kumtou, I no O kimiye cheni.

² Ampeu ye I tuqu eno I liwo, eno I xaphekuluu, I Lhou, I tuqu, I no O launo sükusho lucheni, I züto, I xakulu kibo, eno Iw sükusho-a.

³ I no Ampeu, khuu sheqhe küzü keno Pa ku, eno ni ye I ghümi launo xaluve.

⁴ Akithi kighi no I botha luve; shiküpsa zükuqo no I vesüvae;

⁵ Kithigha kighi no I meluvae; akithi lichhe no I sasü küpüghü ani.

⁶ I mlo kighishi lono I no Ampeu kue; I Lhou lau I no akukuphu ghenguno ighamkue. Pa chineki lono Pa no I sütsa chilu tsü, Pa no I küqa chiluve tsüae.

⁷ Tile ayeghi no khokhoshi eno itha thuve; naghuto boqha ghi süküghütha eno ithauve, kughengu Pa no axuideve ke.

⁸ Pa nigipe lono amchhi phoipeghi, eno Pa kichi lono ami mili, amibalu iqü akeu ipeghie.

⁹ Pa no atsütsü kiyeve no iqighi; aküzü kutho no Pa pukhu qholo ae.

¹⁰ Pa no cherub shou ikuno yewu; Pa no amülhü chishibo lono yeighi.

¹¹ Pa no aküzü pesü Pa khonha, azü gholono aküzü kutho khüngküsü pesü Pa pushonha mlake.

¹² Pa zülo aküvü lono mürasü eno amibalu no Paw khüngküsü vexü ipeghie.

¹³ Ampeu no kungugha lono tsütsüsü, Shishe Akiqheu no sheshu, mürasü ngo amibalu ipeghie.

¹⁴ Pa no Pa piji kapuwu no panoqo hapupove; Pa no tsütsüpha kulo no panoqo haleve.

¹⁵ O Ampeu, Nono alomipi kelo, O nigipe lono atuthu shephe kelo, azüghi qowu akeqo ithulu, eno ayeghi boqha vezaleive.

¹⁶ Pa no kunguu no ni ikhiluve; Pa no azüghi lono I sünhephe luve,

¹⁷ Pa no I ghümi kumto launo eno I mithi chekemi launo I xaphelue, kughengu panongu ye I ghenguno shishe akumto ke.

¹⁸ I mhekiqi tsala lo panongu no I mjochile, ikemu Ampeu no I sakuphuu shie.

¹⁹ Pa no aghüche kivi lo I saipeghi; Pa no I xaphelu, kughengu Pa lokiqi I lau ake.

²⁰ Ampeu no I chipiu mikucho kiqi lono I lau mlatsü; I u kimthe kiqi lono Pa no asaxü I tsüe.

²¹ Kughengu I no Ampeu laghi pape, eno kixikila shi I Lhou launo tsüghüve moke.

²² Kughengu Paw pimheye kümtsü I zülo ani, eno Pa khuaye I no phevemoe.

²³ Pa zülo ni ye tukutiye shimoe eno akipimi lono ni ye putosü ke.

²⁴ Ikehu Ampeu no I chipiu mikucho kiqi lono, Pa nhethe lo I u akimthe shi akeu kiqi lono asaxü I tsüvae.

²⁵ Kimiyeqhiyi kemi lau Nono kimiyeqhiyi keu piye cheni; tukutiye küha kemi lau Nono tukutiye küküha piye cheni;

²⁶ mqhamqhi kemi lau Nono mqhamqhi keu piye cheni; eno chighichilai kemi Nono saküghüzü cheni.

²⁷ Kughengu Nono aqhokighemi xalu cheni, ikemu tsütsüngoju kemi ye Nono sünheqhive cheni.

²⁸ Kughengu I kulu küiqü tsükeu ye No ke; Ampeu I Lhou no I küzü yepüvü tsücheni.

²⁹ Kughengu O vecheo I no ghüshimi loji hawu nani, eno I Lhou vecheo I no aliwo ilhechelu nani.

³⁰ Alhou hipau—Pa laghi ye kupukülai; Ampeu tsa ye kuchou kepi kiqiphe lue; khunono Pa launo sükusho lucheni keno Pa ye tipano züto ke.

³¹ Ikemu Ampeu no kumo aye khuu no Alhou kea? Ni Lhou likhi no kumo aye, khuu no atuqu kea?—

³² Alhou no akumto pesü I lolo shepichhi tsüe eno I laghi lo tukutiye kühakeu shitsüe.

³³ Pa no I pukhu pesü ashe pukhu toi shitsü eno qhemghai ke-a lo I pelo tsaqüi ngolupe.

³⁴ Pa no aghüshi ghenguno I u qophetsü, tigheno I u no shexilika lakhi sükuholue.

³⁵ Nono Ow xakulu züto pesü I tsüvae, eno O u ajeu pesü I saphu tsüe, eno O kümtsha no I pelo kije shilupe.

³⁶ Nono I pukhu kinepu qholo a-a ililai ghope qhitsü, eno I pukhu ye nekiphe pemoe.

³⁷ I no I ghümi hawu eno panoqo haluve, eno panongu kütsakhave moke kutolo idechile womoe.

³⁸ I no panoqo jipilive, ikehu panongu ye ithughi mlave; panongu ye I pukhu qholo ikiqive.

³⁹ Kughengu Nono aghüshi ghenguno akumto pesü I tsüe; khunono I mjochile keno Nono panoqo pelo I qholo ikiqivepe.

⁴⁰ Nono I ghümi pelo I launo kughosü wuvepe, eno khunono I mithi cheni keno I no kütsave.

⁴¹ Panongu no kuphu penike ighae, ikemu khunomu xalu moe; Ampeu lau igha kemu Pa no khochile moe.

⁴² I no amülhü zülo ayeghimkhu toi panoqo kutholeve; alaghila lo aniba toi I no panoqo küzaleve.

⁴³ Timiqo no I qoda niye akelono Nono I xaphelue; Nono I pelo shiyeqo kütsü shilupe; I no khunoqo ithimo keno tipaqo no I qeke.

⁴⁴ Panongu no I sütsa chilu khavi I gholue; inaghami no I lau ipu-itsa ighi.

⁴⁵ Inaghami no amlo hauve eno pano liwo lono khokhoshi ipeghi.

⁴⁶ Ampeu ye xüani, I tuqu shipili lo, eno I xakulu Lhou sheqhelo.

⁴⁷ Pa ye Alhou, I mkhükuluu eno ashiaye pesü I qholo qhitsü keu,

⁴⁸ Pa no I ghümi launo I xaphetsü, iyei, I mjochile ipeghi kemi shou I süqhe ke; Nono ngukangughami launo I xaphelue.

⁴⁹ O Ampeu, shiyeqo gholo hi ghenguno I no O sheqheni, eno O je sheqhe ale pheni.

⁵⁰ Pa no xakulu kije Pa kükau lau süghitsü, Pa no nukishe luve keu David ngo pa tikughuko lau alholo iqemokeu kikimiye piye.