LESHELE 17 - Sumi Naga CL (Re-edited) Bible (BSI)

O Chishibo Sükusho Qholo

David Kighini

¹ I chipiu kighini ini tsülo O Ampeu; I sütsa chilu tsülo! Pishikiqhi küha keu kichi lono inikhu keu ini tsülo!

² I chipiu xakütha O zülo ighi pelo! O nhethi no achipiu ithulu tsülo!

³ Nono I mlo pejuvae, putho lo Nono I xuju ighi, Nono I pejuve ake kiumu ithulumo nani; I kichi ye axine shimoe pi I no thebeivae.

⁴ Timi kümla lo O kichi lono ipeghi keu tsa lono ni ye ngukangughami laghi mxüve.

⁵ I pukhu ye O laghi lo mtotoi ani; I pukhu ye nekipheve mphie.

⁶ I no O ku ani, kughengu No ye I khochile nani, O Alhou; O kini I lau kugho puwolo; I tsa chilu tsülo.

⁷ O, aghümi launo O u ajeu sükusho phuche kemi Xakuluu, akümzapu shi Ow iqemokeu kikimiye piye tsülo.

⁸ I pesü O nhethe lo anhekiyighi shi qhitsülo; O chishibo qholo I peküsü tsülo,

⁹ kixikilami I lau ngukangugha shi chekemi launo, akithipu ghümi I sühope akeqo launo I peküsü tsülo.

¹⁰ Panongu ye kikimiye lono pano mlo khathavae; pano kichi lono panongu no aqheküza shi picheni.

¹¹ Itehi panongu no ni laghi süho luvae; ayeghi lo ningu tukuluqhi niye panongu no juani.

¹² Pa ye abongshuu lhothe no ala thepe aketoi, abongshuu no tsüqhi niye khelho aketoi ani.

¹³ Ithulo, O Ampeu! pa mjochile lo, pa qhasüve lo! O zütakikihi pesü kixikilami launo I ngulho xaphe tsülo,

¹⁴ O Ampeu, O u pesü timi hipaqo launo I xalu tsülo, ayeghi lo timi saje ye aküxü hipau lo anie. Nono küakini pesü pano tita shepichhi tsüe; panongu ye atianuli jupe aghapiqi luvae, eno pano küakini pesü pano tianuli ghenguno qhivae.

¹⁵ I ghengu ye, I no achipiu mikucho lono O gilo juni; kughou I no ithughini keno, O kimihi lono I ghapiqi luni.