LESHELE 16 - Sumi Naga CL (Re-edited) Bible (BSI)

No ye I Ngulho Phevemo nani

Davidw Leshele

¹ I süsho lo, O Alhou, kughengu ni ye O lau sükusho lucheni.

² I no Ampeu vilo pi, “No ye I Mpeu; ni ye O nguno alau akivi kütau ye kühae.”

³ Ayeghi lo kimthemi akeqo ye akighichemi ke, pano lau I züküvü kümtsü ani.

⁴ Khunono alhou kütau pape cheni keno amlo ghime küghüsü nani; ni ye panow ajih kümllagho leqhi tsümo momu pano je pesü I kichi lo pimo nani.

⁵ Ampeu ye I mheghi eno I jukhu; Nono I saje tsüqüpe ani.

⁶ I ghuthu ghiphi ye a-a alokepu lo shilue; itsae, ni ye amheghi jukivi ani.

⁷ Ampeu khuu I mijetsü cheni keno I no sheqheni; putho lo ghi I mlo no I qophe acheni.

⁸ Ni ye alhokuthu Ampeu pesü I zülo qhicheni; kughengu Pa no I u ajeu ani, ni ye ithavemo nani.

⁹ Tighenguno I mlo no alovi, eno I phimpi no alokiqi shi ani; I phimpi ghi iqüghai ngolue.

¹⁰ Kughengu No ye I ngulho pesü Kithighau qhitsümo nani, momu Ow timi pelo shiküpsa ithulu pemo nani.

¹¹ Nono aküxüpu laghi I pelo ithilupe; O zülo alokivi no chhitoi ani; O u ajeu ye pülhapuju alokiqi acheni.