LESHELE 149 - Sumi Naga CL (Re-edited) Bible (BSI)

Ampeu lau Ale Kithe Phelo

¹ Ampeu sheqhelo! Ampeu lau ale kithe phelo, Pa shekiqhe le küpülümi hoho lo phelo!

² Israel pelo Pa Pulhoküsüu lau amlokiqi shipelo; Zion tianuli pelo pano kükau lau alokiqi shipelo!

³ Panoqo pelo ilhe ghi Pa je sheqhe pelo, bombo ngo akighilebo pesü Pa lau alekungo phelo!

⁴ Kughengu Ampeu no Paw timi lau azüküvü acheni; Pa no xakulu pesü aqhokighemi nanu shitsü cheni.

⁵ Alhou timiqo pelo ajuküvü lono alovishe pelo; pano lüpa lo alokivi shi alephe pelo.

⁶ Panongu no Alhou sheqhe kelo alovi ighamku pelo, eno putoputo zütakikihi panoqo u lo pesü ngo pelo,

⁷ ti ye shiyeqo lau amkhülu peniye eno timiqo lau aghime tsü peniye ke,

⁸ panow kükami yikichhe no tshüluve eno pano yepemi yikichhe no tsügha luve,

⁹ pano shou yepüakeu küghakütha süghi peniye ke! Hi ye Paw küpülümi kümtsü ghenguno agigihu ke. Ampeu sheqhelo!