LESHELE 148 - Sumi Naga CL (Re-edited) Bible (BSI)

Ampeu Je Sheqhelo

¹ Ampeu sheqhelo! Kungugha lono Ampeu sheqhelo; akiqheu lono Pa sheqhelo!

² Paw kungumi kümtsü no Pa sheqhelo; Paw aqokitikhi kümtsü no Pa sheqhelo!

³ Khetsünhe ngo aqhi, Pa sheqhelo, nongu ayepu phuphushi akeqo kümtsü Pa sheqhelo!

⁴ Kungugha akiqheu eno atsütsü shou azü akeqo, Pa sheqhelo!

⁵ Tipaqo pelo Ampeu je sheqhe pelo! Kughengu Pa no azah tsü kelo tipaqo lhopheve.

⁶ Pa no pülhapuju eno alholo tipaqo ghope qhike; Pa no xaküthaza tsü kelo tipaqo ye hebide mla nani.

⁷ Kungugha lono Ampeu sheqhelo, nongu azüghi kutho lo lhoxü kijeqo,

⁸ ami eno apüghü, mürasü eno khüngküsü, pasapagha mülhü hipaqo ye Pa tsa shikupu akeu ke!

⁹ Naghuto eno atoghiqo, axathibo eno cedarbo kümtsü!

¹⁰ Tüghashi eno tikishi kümtsü, itikiche eno yekiche ghauqo!

¹¹ Ayeghi lo kükami eno timi kümtsü, kükapumi eno ayeghi lo yepemi kümtsü!

¹² Apumi ngo ilimi kümtsü, muchomi eno itimiqo!

¹³ Panoqo pelo Ampeu je sheqhe pelo, kughengu Pa je likhi no akiqheu ke; Pa kükanguagha ye ayeghi ngo atsütsü shou ani.

¹⁴ Pa no Paw timi ghenguno akibo süqhe, Paw timi kümtsü, Israelmi khunono Pa kupunu ani keno Pa sheqhelo. Ampeu sheqhelo!