LESHELE 147 - Sumi Naga CL (Re-edited) Bible (BSI)

Amlo Ipopinyi Kemi Shipivi cheni

¹ Ampeu sheqhelo! Kughengu ni Lhou lau shikipili le phekeu ye aloe; kughengu hi ye alokiqipu, eno shikipili le ye achipi loke.

² Ampeu no Jerusalem shiqhe cheni; Pa no Israelmi hapheve kemi hekütsü cheni;

³ Pa no amlo ipopinyi kemi shipivi eno pano zaku khatsü cheni.

⁴ Pa no ayepu khije akepu keno kihitha tsü; Pa no ti kümtsü aje kutsüe.

⁵ Ampeu ye kije, eno akughushu küka ani; Paw vethakulu ye mighi khamlae.

⁶ Ampeu no aqhokighemi süqhe cheni; ikemu kixikilami ayeghi lo qodave cheni.

⁷ Ampeu lau shikimthikütsü le phelo; akighilebo pesü ni Lhou lau ale kungo phelo!

⁸ Pa no khüngküsü pesü kungugha nhape qhi; Pa no ayeghi ghenguno tsütsüghu kutotsü; Pa no atoghiqo lo atsüni pelo thuwu lupe.

⁹ Pa no achuqupu tüghashiqo tsü, eno aghati no igha kelo loji cheni.

¹⁰ Pa züküvü ye khurshi kumto lo anike kumoe, momu Pa lokiqipu ye timi pukhu lo achemoe,

¹¹ ikemu khunono Pa sümsa eno Paw iqemokeu kikimiye shou pükhü cheni keno Ampeu ye pano lau alokiqi acheni.

¹² Ampeu sheqhelo, O Jerusalem! Ampeu sheqhelo, O Zion!

¹³ Kughengu Pa no Ow khagho khaduqo shikumto tsüke; Pa no o kibo lo o nuliqo kümgha tsüe.

¹⁴ Pa no no yeghi lughi lo külashi tsü; Pa no athi akiviu pesü O shepichhi tsüke.

¹⁵ Pa no ayeghi lo Pa zakütsü tsükelo Pa tsa ye mthüthei ke.

¹⁶ Pa no amhiphi toi mürasü tsü; eno ayevu toi avütsa veleke.

¹⁷ Pa no atumlo toi apüghü puwu; khuu no Pa kumko zülo puthugho luni kea?

¹⁸ Pa no atsa pi kelo mürasü no azü ilhouve; Pa no amülhü puwu kelo azü no qowuke.

¹⁹ Pa no Jacob lau Pa tsa sheshu, Pa zakütsü eno pimheye Israel tsüke.

²⁰ Pa ye khuno shiye mu sasü hitoi shipüamoe; panongu ye Paw pimheyeqo mthae. Ampeu sheqhelo!