LESHELE 146 - Sumi Naga CL (Re-edited) Bible (BSI)

Alhou Shou Likhi Pükhübelo

¹ Ampeu sheqhelo! Ampeu sheqhelo, O I ngulho!

² I no xüake tivilo ni ye I Lhou sheqheni. I küxü akelo ni ye I Lhou lau shikipili le pheni.

³ Sakiphemi shou o küpkhü qhi kevilo, timi shou pükhübe kevilo, pa ye xakulupu kühae.

⁴ Kughou pa tuthu kühaveni keno, pa ye ayeghi lo idewove cheni; Tipa tsala lono pa kukughu ye pühave cheni.

⁵ Khunono Jacob Lhou launo akukuphu lucheni keno, khunow lajupu no Ampeu Alhou lau ani keno alokivipue,

⁶ Pa no kungugha eno ayeghi, azüghi eno tile akeqo lhoke, Pa ye alholo pükhükulupu ke;

⁷ nedaqoda püakemi saphu ghi Pa no kuchou xakütha tsü cheni, Pa no müzüthi akemi lau achuqupu tsü cheni. Ampeu no akughumi khaqhiphe cheni;

⁸ Ampeu no anhechemi nhethi khaqhi tsücheni; khunono qhoqhü itsaqi cheni keno Ampeu no xaqhe cheni; Ampeu no amikuchomi kimiye cheni.

⁹ Ampeu no kupokichemi jukuto cheni; Pa no chimemi eno mighimi sünheqhe cheni, ikemu kixikilami laghi ye Pa no kütsakungo keu lo saghive tsücheni.

¹⁰ Ampeu no alhokupuju ayepe nani, O Zion, O Lhou no tiqheli kümtsü lo ayepe nani. Ampeu sheqhelo!