LESHELE 145 - Sumi Naga CL (Re-edited) Bible (BSI)

Ampeu ye Kije

Davidw Shekiqhe Le

¹ I Lhou eno I kükau, I no O sheqheni, pülhapuju eno alholo O jepipi tsüni.

² Tsala kipetsü I no O sheqheni pülhapuju eno alholo O je sheqheni;

³ Ampeu ye kije, eno akiqheu lono Pa sheqhe kepue; Pa kughushu ye phukümlapue.

⁴ Tiqheli lakhi lono lakhiu kutolo O kümla pikibe nani, eno O kughushu kümla shuphe nani.

⁵ O kükanguagha juküvü jekipi eno Ow akümzapu kümlaqo lo I no kümsüputhoni.

⁶ Panongu no Ow akümzapu kümla kughushu pi nani, eno No ye kiutoi kije keno I no shupheni.

⁷ Panongu no o jekipi kivi kümtsü pi nani eno O chipiu mikucho shipili igha nani.

⁸ Ampeu ye küpüqhiyi eno kimiyeqhiyi ke, asheshi no amloide cheni eno iqemokeu kikimiye no chhitoie.

⁹ Ampeu ye kümtsü lau aloe, Paw kimiyekini ye Pa no lhokeu kümtsü shou ani.

¹⁰ Lhoxü kümtsü no shikimthi keu O tsü nani, O Ampeu, eno Ow timi kümtsü no O sheqhe nani!

¹¹ Panongu no O kükaqha juküvü ghili kügha nani eno O küka ghili pi nani,

¹² timi pelo O kughushu kümla eno O kükaqha juküvü jekipi ghili ithipe nani.

¹³ O kükaqha ye lhokta kükaqha, eno O yekipeqha ye tiqheli kümtsü lo acheni. Ampeu ye Pa tsa lo pükhükulupu ke, eno Pa kümla kümtsü lo kimiyekini ke.

¹⁴ Veqhive niye akemi Ampeu no sünheqhe cheni eno khunono qhoqhü itsaqi ani keno pano xaqhe cheni.

¹⁵ Kümtsü nhethi no lajuqhiyi O lau jupuwu cheni, eno Nono atusho achipi lono pano chuqupu tsücheni.

¹⁶ Nono pano u xükhotsü cheni; Nono aküxüküa kümtsü ghapiqi tsücheni.

¹⁷ Ampeu ye Pa laghi kümtsü lo amikucho eno Pa kümla kümtsü lo kimiyekini ke.

¹⁸ Ampeu ye khunono kuchou lono Pa ku cheni keno pano phivilo ani.

¹⁹ Pa sümsa chekemi no kümsü pulo keu shikupu tsücheni; Pa no pano sütsa chilu no xalu cheni.

²⁰ Ampeu no Pa kimiye chekemi kümtsü püxü cheni, ikemu kixikilami ye kümtsü Pa no kütsave cheni.

²¹ I kichi no Ampeu shekiqhe tsa pi nani, lhoxü kümtsü no pülhapuju eno alholo Pa kimthe je shelo.