LESHELE 144 - Sumi Naga CL (Re-edited) Bible (BSI)

I Tuqu eno I Liwo

David Le

¹ Ampeu, I tuqu, sheqhelo, Pa no aghüshi ghenguno I u ngo I u lotiqo qophetsü cheni.

² Pa ye Iw iqemokeu kikimiye eno I liwo ke, Iw sükusho-a eno I xaphekuluu, khuu lau I no sükusho lucheni keno I züto huke, Pa no ashiayeqo I qholo qhitsüe.

³ O Ampeu, timi ye kiue pi No ye pa ikhilu cheni, momu timi nu ye kiue pi No ye pa kümsü cheni kea?

⁴ Timi ye atuthu lakhi toike; pa tsala ye wove chekeu yekükhü toike.

⁵ O Ampeu, atsütsü kiyeve no aqhou iqighi lo! Naghutoqo buju lo tishiaye tipaqo ye amchhi phoipeghi nani.

⁶ Tsütsüpha kulo puwulo eno panoqo kuthole lo; O piji kapuwu no panoqo haleve lo!

⁷ Kunguu no O u chhopiqi lo, azü kutho eno inaghami u lono I xaphetsü eno I xalu tsülo,

⁸ panongu kichi no akimki tsa picheni, eno panongu u ajeu ye pishikiqhi u ajeu ke.

⁹ I no ale kithe lakhi O ghenguno pheni, O Alhou; I no akighi chighilebo küigha no O shipilini,

¹⁰ Nono kükamiqo tokulu tsü cheni, Nono ayiküsa zütakikihi lono O qeu David xaphelue.

¹¹ Inaghami u lono I xaphe eno I xalu tsülo, panongu kichi ye akimki tsa picheni eno pano u ajeu ye pishikiqhi u ajeu ke.

¹² Ni punoqo pelo pano lhothe lo mtotoike süboqo toi pelo, ni ngaqo pelo akighiki lo acheku tsükuchoqo toi pelo;

¹³ ni biale pelo chhitoilu pelo, tüxatini kümtsü ipeghi pelo; ni mbeqo no qhethonhe piti kighishe lupelo eno ni luza lo qhethonhe chighi ipeghilu pelo;

¹⁴ ni mishiqo pelo ati pulu pelo, ghüza ghügha momu ati ijovepe kevilo; ni laghila lo aghime kitikhi küqa chilupe kevilo!

¹⁵ Khuno shou kükümgha hipaqo ikughini keno alokivipue! Khuno Lhou no Ampeu keno pano lokivipue!