LESHELE 143 - Sumi Naga CL (Re-edited) Bible (BSI)

I Ngulho no Tüghüthi ani

Davidw Leshele

¹ O Ampeu, I kighini chilu tsülo; Kimiyeqhiyi penike I no qhüiniju akeu chilu tsülo! O pükhükulu, O chipiu mikucho vecheo I khochile lo!

² O qeu sasü küghakütha lo ilo kevilo, kughengu O zülo xü akemi khumu amikucho kumoe.

³ Kughengu I ghümi no I ngulho hakuqo ani; pa no I küxü pesü ayeghi lo I munuda qhivae; khaghi no thive kemi toi pa no I pelo aküzü lo iqape.

⁴ Tigheno I ghungu ye lhovae; I lolo I mlo ye mamaivae.

⁵ I no khaghi tsala kümsülue; Nono shikeu kümtsü I no kümsüputho ju; O u lo kümlaqo I no kümsükuto juke.

⁶ I no O lau I u sükho ke; qhaike yeghi toi I ngulho no tüghüthi O phu cheni.

⁷ Mtazü I khochile tsülo, O Ampeu! I ghungu ye lhovae! I launo O gi küsüve kevilo, tikumo aye ni ye aqo lo iqive kemi toive niae.

⁸ I pelo inaqhe Ow iqemokeu kikimiye chilu pelo, kughengu I no O pükhü cheni. I no püla masa keu laghi I pelo ithi pelo, kughengu I no O lau I ngulho süqhe ani.

⁹ I ghümi launo I xalulo, O Ampeu! Sükusho ghenguno I no O lau poighivae.

¹⁰ O pulou shinike I shika piyelo, kughengu No ye I Lhou ke! O Ghungu kivi no müdüniyi keu aqa yeghi lo I sache pelo!

¹¹ O Ampeu, O je ghenguno I püxü tsülo! O mikucho pesü aveküsa lono I ngulho saipeghi tsülo!

¹² Ow iqemokeu kikimiye lono Nono I ghümi hathave nani, Nono I ghümi kümtsü kütsave nani, kughengu ni ye O qeu ke.