LESHELE 142 - Sumi Naga CL (Re-edited) Bible (BSI)

No ye I Küghütshü-a

David Le. Pa no atuki lo akelono akighini shikeu

¹ I sütsa süqhepe I no Ampeu lau ighamku ani; I sütsa süqhepe I no Ampeu pelo kimiye tsü penike qhüiniju ani.

² I no I kumchho Pa zülo süghi; I no Pa zülo I veküsa pike.

³ Kughou I nguagha lhove keno, Nono I laghi ithitsü cheni! Alaghi khile I no checheni keno panongu no I ghenguno alichhe küsüpe qhipüani.

⁴ Ajeu jupuwo julo: khunomu ni ithulu amoe; I no ijekulupu kiumu kühae; khunomu I ngulho hiju amoe.

⁵ O Ampeu, I no O lau ighamku ani; I no pi, “küxümi yeghi lo No ye I küghütshü-a, I saje ke.”

⁶ I sütsa chilu tsülo, kughengu ni ye ighono amlo savae. I kijipüsa akemi launo I xaphelo, kughengu panongu ye I nguno ighono mtotoi ani!

⁷ Akughuki lono I saipeghi lo, tishiaye I no O je shikimthini! Amikuchomi no I homxa nani, kughengu Nono pofushi I lau akivi mla nani.