LESHELE 140 - Sumi Naga CL (Re-edited) Bible (BSI)

Kixikilami launo I Xaphelo

Davidw Leshele

¹ Kixikilami launo I xaphelo, O Ampeu; ngukangughami launo I püxüpe qhitsülo,

² pano mlo lo kixikila kuchughu eno aghü shinike tamo mithe xukutho cheni.

³ Apighi toi panongu mili ye tsüghaminhei ke, eno pano kichi ye tuopighi tüghü toike.

⁴ O Ampeu, kixikilami u lono I süsho lulo; ngukangughami launo I püxüpe qhitsülo, panongu no I püxaqhi niye kuchughu cheni.

⁵ Qheza-laki chekemi no I ghenguno alichhe shipüani; panongu no ayitho lichhe shipüani; panongu no I ghenguno ala lo alichhe shipe qhipüani.

⁶ I no Ampeu vilo pi, No ye I Lhou, kimiyeqhiyi penike I no qhüiniju keu sütsa chilu tsülo O Ampeu!

⁷ O Ampeu, I Mpeu, I xakulu kumtou, aghükishi tsala lo Nono I kütsü peküsü tsüke.

⁸ O Ampeu, kixikilami no pulo keu shitsü kevilo; pano kixikila kukughu achipikalupe kevilo, tikumo aye panongu ye chuqulove nosae.

⁹ I homxape akeqo kütsü, eno panow mqümgha kichi no pano mhoqhive pelo!

¹⁰ Amibalu iqü akeu no pano shou ikughi pelo; panoqo ye ami lo vesüve lo, ipeghi mlave kepushi aniba qokutho lo ilove pelo!

¹¹ Akimkimi pelo ayeghi lo apaqa luvepe kevilo; alhoksa pelo mtazü nguka-ngughami kütsave pelo!

¹² I no ithi anie, Ampeu no aghime kitikhi lo akemi süsho cheni, eno kumlhomi ghenguno kuchou xakütha süghi tsü nani.

¹³ Mtsüqheino amikuchomi no O je shikimthi nani; achipiu shiche kemi no O zülo xülu nani.