LESHELE 139 - Sumi Naga CL (Re-edited) Bible (BSI)

I Phuju lo eno I Mlo Ithi tsülo

Davidw Leshele

¹ O Ampeu, Nono I phujuvae eno ni ithivae!

² Kughou I no iqa eno I no ithughi keno Nono ithi ani; Nono putou no I kükümsü jupililu ani.

³ Nono I laghi eno I no ikiqi ihozü keu phuju cheni eno I laghi kümtsü ithi ani.

⁴ I kichi lono atsa piqhi mphi züu nomu julo, O Ampeu, Nono ti kuchopu ithi ani.

⁵ Nono I thiu eno I züu bothasüpe acheni, eno O u no I süshope acheni.

⁶ Titoi keu kighithi ye I ghenguno shishe akümzapu ke; ti ye qhemghai ke, ni ye tipau iku tomlae.

⁷ O Ghungu launo ni ye khilau wuluni kea? Momu O zülono ni ye khilau pokulupu kea?

⁸ Tsala I no atsütsü lo ikughi namu, No ye tilau ani! Tsala I no Kithigha lo ihozü namu No ye tilau ghi ani!

⁹ Tsala I no inaqhe chishibo xapu yewuve no azüghi kutho lo ilove namu,

¹⁰ tilau ghi O u no I sache nani, eno O u ajeu no I mtuluve nani.

¹¹ Tsala I no, “Mtsüqhei aküzü no I küzüluve nani, eno aküvü no I bothape aküzü shive nani” ipi aye

¹² aküzü ghi O ghengu ye züchiyi moe; O ghenguno putho ye puchou toi vüqai, kughengu O gholo aküzü ye aküvü toike.

¹³ Kughengu I lolo aleqhi kümtsü Nono lhosüke; I za tita lo Nono I ghoküna küqha tsüke.

¹⁴ I no O she ani, kughengu akichiqhipu eno akümzapu shi I lho püanie. O kümlaqo ye akümzapu; I ngulho no mtsümishei ithi ani.

¹⁵ Tuqhouno I ghi-anhü kughulhophe akelo, I za tita lo kutokupui I kimepe qhi akelo, ni ye tilau anie pi Nono ithiae eno O launo küsüve mlae.

¹⁶ Apo lo azü ghoaphi lono O nhethi no ni ithulue; I ghenguno atsala khije kuto püatsü ani keno I tsala huthu mphi lono ti kümtsü Nono azünatha ghi Ow kaku lo yekütsüpe qhivae.

¹⁷ O Alhou, O kükümsü ye I ghenguno kishi akughupu kela! Tipaqo küqha kelo khijehi kela!

¹⁸ Tsala I no tipaqo kihiju aye asaye lothi nguno akichiu ke. I no züithughi kelo ni ye O gholo aghike.

¹⁹ O Alhou, Nono küsaküghami ghiqhive tsüke aye lae! O ajiküxümi, I launo chevelo!

²⁰ Panongu no mqümgha kimji lono O lachile atsa pike; O ghümi no ameküküha lono O je peitha ke.

²¹ O Ampeu, ni ye O mithi chekemi mithi chenike kumo? Ni ye O hebide chekeqo I phimqhü chenike kumo keshea?

²² I mlo kümtsü no I no panoqo mithi cheni; ni ye panoqo pesü I ghümi kepi kihi cheni.

²³ I phujulo, O Ampeu, eno I mlo ithi tsülo! I pejulo eno I kükümsü ithi tsülo!

²⁴ Eno I lolo kixikila kiukiumu aghini mala jutsülo; eno lhokta laghi lo I sawulo!