LESHELE 138 - Sumi Naga CL (Re-edited) Bible (BSI)

Shikimthi keu Ampeu Tsülo

David Le

¹ O Ampeu, I mlo kuchopu pesü I no O shikimthini; alhouqo zülono I no O shekiqhe le phe ani.

² I no O kimthe chineki küdau juno itsaqi no Ow iqemokeu kikimiye ngo pükhükulu ghenguno O je shikimthi cheni, kughengu Nono O je eno O tsa pesü thokha kümtsü nguno akiqheu lo qhike.

³ I no O kuke tsala lo Nono I khochile; Nono I ngulho lo aküka mtotoilu peke.

⁴ O Ampeu, ayeghi lo kükami kümtsü no O shikimthi nani, kughengu panongu no O kichi lono pikeu tsa chiluvae,

⁵ eno panongu no Ampeu laghiqo shipili nani, kughengu Ampeu juküvü ye kije ke.

⁶ Kughengu Ampeu ye qhemghai animu aqhokighemi kihi acheni, ikemu aqheküzami ye Pa no putou no ithi acheni.

⁷ I no aveküsa lo cheche namu, Nono I küxü püxü tsüe; Nono O u xachhope I ghümi loghu tuchile, eno O u ajeu no I xaphe tsüke.

⁸ Ampeu no I ghenguno Pa kimji shikupu tsü nani; O Ampeu, Ow iqemokeu kikimiye ye alholo acheni. O u no mla keqo pheve kevilo.