LESHELE 135 - Sumi Naga CL (Re-edited) Bible (BSI)

Ampeu Je ye Alholo Acheni

¹ Ampeu sheqhelo! Ampeu je sheqhelo, O Ampeu qemiqo, akishe pesü Pa tsülo,

² khunono Ampeu kilo puthugho acheni eno ni Lhou chineki lo acheni keno Ampeu sheqhelo!

³ Ampeu sheqhelo, kughengu Ampeu ye aloe; Pa je shipili lo, kughengu ti ye alokiqipu ke.

⁴ Kughengu Ampeu no Pa salashi Jacob kisheluke, Israel pesü Pa mheghi shike.

⁵ Kughengu I no ithi ani, Ampeu ye kije ke, eno ni Mpeu no alhou kümtsü nguno akijeu ke.

⁶ Atsütsü lo eno ayeghi lo, azüghi lo eno akuthoku lo Ampeu no kiu pulo keno Pa no shi cheni.

⁷ Pa no khüngküsü pelo ayeghi shekhau no ikughipe cheni, Pa no tsütsüpha mlake, eno amülhübo lhaphe cheni.

⁸ Egypt lo timi eno tüghashi anoghiu pithikeu ye Pa no ke;

⁹ O Egypt, nongu lau Pa no Pharaoh eno pa qemi kümtsü lachile ghi amchipu ngo akümzapuqo puwu ke;

¹⁰ Pa no shiye kutomo kütsave eno kükami kumtoqo pithive,

¹¹ Amorimi kükau Sihon, eno Bashan kükau Og, eno Canaan kükaqha kümtsü,

¹² eno pano yeghi pesü amheghi shi Paw timi Israelmi lau amheghipu shi tsüve.

¹³ O Ampeu, O je ye alhokupuju acheni, O Ampeu, O juaje ye tiqheli kümtsü lo ache nani.

¹⁴ Kughengu Ampeu no Paw timiqo saphu nani, eno Pa qemiqo kimiyeqhiyi tsü nani.

¹⁵ Shiyeqo julho ye ghükayi ngo ameshoyi ke, ti ye timi u no mlakeu ke.

¹⁶ Tipaqo ye akichi ani, ikemu atsa pimla; anhethi ani, ikemu ithumla;

¹⁷ tipaqo ye akini ani, ikemu chilu chemo, momu panoqo kichi lo atuthu kühae.

¹⁸ Khunono tipaqo mla keno panongu ghi tipaqo toive cheni, ikehu tipaqo shou pükhü kemi kümtsü tipaqo toive nani.

¹⁹ O Israel laghami, Ampeu sheqhelo! O Aaron laghami, Ampeu sheqhelo!

²⁰ O Levi laghami, Ampeu sheqhelo! Nongu khunono Ampeu sümsa cheni keno, Ampeu sheqhelo!

²¹ Zion lono Ampeu sheqhelo, khuu Jerusalem lo ani keno, Pa sheqhelo! Ampeu sheqhelo!