LESHELE 132 - Sumi Naga CL (Re-edited) Bible (BSI)

Ampeu no Zion Kisheluvae

¹ O Ampeu, David no shiluküsa lo kutuu keu kümtsü je lono pa kümsülu lo,

² pa no Ampeu lau ashoqhi shino Jacob Lhou Akughushuu lau tushoqhi ke,

³ “Ni ye I kilo ilomoni momu I zü-a damoni,

⁴ ni ye akulho qhimoni momu zühu moni,

⁵ ti ye I no Ampeu ghenguno, Jacob Lhou Akughushuu ghenguno ngokepu-a lakhi ithulu moke kutolo tishi anani.”

⁶ Julo, Ephrathah lono ningu no tipau chiluvae; ningu no Jaar luza lono tipau phuluvae.

⁷ “Ningu Ampeu kilo wuni nolo; ningu no Pa pukhu nepa lono Pa mllani nolo!”

⁸ Ithulo, O Ampeu, No eno O kughushu Puloshoqhi bohu ishi O kulhokiqhi-a lo ighilo.

⁹ O chinemi pelo achipiu mikucho pepu pelo, eno Ow akimthemi pelo alokivi lono ighamku pelo.

¹⁰ O qeu David je lono, Nono nukishe luve keu lau O gi kughove kevilo.

¹¹ Ampeu no David lau thebei ashoqhi shike Pa ye tipau lono tsüghüve monani: “O nuliqo dolo lakhi I no o kükalakhü lo puku nani.

¹² Tsala o nuliqo no Iw puloshoqhi eno I kükütsü tsa I no panongu shika keqo papelu aye, panongu tianuli ghi alhokupuju o kükalakhü lo iqa nani.”

¹³ Kughengu Ampeu no Zion kisheluvae; Pa no tipa-a pesü Pa kungo-a shinikeu puloluve:

¹⁴ “Hi ye alholo I kungo-a ke; I no hile ngoni, kughengu I no hipa-a pulo luvae.

¹⁵ I no kupukuno shi Zion kümgha tsü nani; I no achuqupu pesü kumlhomi ghapiqi tsü nani.

¹⁶ I no xakulupu phimini pesü li chinemi pipe nani, eno akimthemi no alokivi lono ighamku nani.

¹⁷ I no tile David ghenguno akibo lakhi mini ipeghipe nani; Iw nukikishe ghenguno akulu lakhi I no kutope qhivae.

¹⁸ I no akukujopu pesü pa ghümi pipe nani, ikemu küka kütsüqho no pa shou yepüvü nani.”