LESHELE 120 - Sumi Naga CL (Re-edited) Bible (BSI)

I xalulo, O Ampeu

¹ I ghime kitikhi lono I no Ampeu kue, eno Pa no I khochile.

² Akimki kichi eno, pishikiqhi mili lono I xalulo, O Ampeu.

³ No pishikiqhi mili xapu akeu, Alhou ye kiu o tsüni, eno itaghi kiu o lau shitsüni kea?

⁴ Ghüshimi lakhi piji tsüghaminhei keu eno amiyi huchuyi piti akeu pesü ghime nani!

⁵ I no Meshech lo itsü kupokiche shiche keu eno Kedar phiki lo küghüna chekeu no I ghenguno ahasapue!

⁶ Khunono külakishi mithi cheni keno tipaqo gholo ni ye ado kushuo küghünavae.

⁷ Ni ye külakishi ghenguno ke, ikemu kughou I no atsa pini keno, panongu no aghüshi kutouve cheni!