LESHELE 12 - Sumi Naga CL (Re-edited) Bible (BSI)

Pükhükulumi ye Hauvae

Davidw Leshele

¹ Xalulo, O Ampeu, kughengu Alhou ithi kemi kühavae; kughengu timi nuli dolo pükhükulumi hauvae.

² Kümtsü no pa kisüghüu lau akimki tsa pie; amili shobapu eno amlo kini xapusü atsa picheni.

³ Ampeu pelo alaphasü chekeu mili, shishe qheza ghi hitoi pichekeu mili ghithave tsü peniu,

⁴ “Ningu mili vecheo nino toluve nani, ni kichi no ni gholo ani; ni shou ampeu ye khuu kea?”

⁵ “Kumlhomi pükaqhi, aveküsami no aghuju shi kehu, Ni ye itehi ithughi niae,” ipi Ampeu no pi; “Pa no khile sükusho laju cheni keno I no tile pa sawo qhini.”

⁶ Ayikiyiqibo lono ghükayi ghukimtheve ketoi Ampeu tsa ye tsüghükhüi, ghükayi ghuthu tsüni ghukimtheve ketoie.

⁷ O Ampeu, Nono panoqo jukuto anani; Nono alhokupuju hipa tiqhelimi launo ni süsho nani.

⁸ Timi no alhoksa shikeu sheqhe kelo, kixikilami no akuaqha kümtsü lo ililai iqhoiqi cheni.