LESHELE 119 - Sumi Naga CL (Re-edited) Bible (BSI)

O Tsa ye I Pukhu lo Akulu

¹ Khuno laghi no tukutiye küha keno, khunono Ampeu yezah lo checheni keno pano lokivipue!

² Khunono Pa yezahqo pape lucheni, pano mlo kuchopu no Pa phucheni keno alokivipue,

³ khunono akumou shichemo, ikemu Pa laghi lo checheni keno pano lokivipue!

⁴ Nono O yezah pesü ni tsüe eno amlo tsüqhiyi tipau gholu peni keu za tsüke.

⁵ O kükütsü tsa papelu keu lono I laghi iqeve mono ani shike!

⁶ Tishiaye I nhethi süküqü mono O zakütsü kümtsü shou jupukulu eno ni ye akukujo lo ilove monani.

⁷ Kughou I no O mikucho yezah shika luni keno, amlo kimthe pesü I no O sheqheni.

⁸ I no O yezah papeni; khilemu I pheve tsü kevilo!

⁹ Lhothemi lakhi ye kishino pa laghi mqhamqhilu nani kea? O tsa kiqi lono pa laghi jukuto keu vecheo ke.

¹⁰ I mlo kuchopu pesü I no O phucheni; I pelo O zakütsüqo launo itsüsü wuvepe kevilo!

¹¹ I mlo lo O tsa pekütsü luvae, tishikeu lono ni ye O hebide keu xine shimo niye ke.

¹² O Ampeu, O sheqhe ani; O kükütsüqo I shika piyelo!

¹³ O kichi lono pimheye tsükeu kümtsü I no sheshuni.

¹⁴ Aküakini kümtsü nguno alau, ni ye O zakütsüqo laghi lo azüküvü shi cheni.

¹⁵ I no O zakütsüqo kümsüputho nani eno I nhethi süküqü mono O laghiqo ju nani.

¹⁶ Ni ye O kükütsü tsa lo azüküvü shi nani; ni ye O tsa kümsümave monani.

¹⁷ Kupukuno shi O qeu kümgha tsülo, tishianguno ni ye xü nani eno O tsa papelu nani.

¹⁸ I nhethi xükho tsülo, tishianguno O yezah lo akümzapu thimeqo akeu I no ithulu nani.

¹⁹ Ni ye ayeghi lo kupokichemi lakhi ke; O zakütsü I launo küsüve kevilo!

²⁰ I ngulho no ado kümtsü lo Ow pimheyeqo huqhe keu no pitipüza ani.

²¹ O zakütsü lono pove keqo, aqheküzami, müsüinive keqo Nono sakiyi cheni.

²² Küthakügha eno jukünatha keu I launo ikhive tsülo, kughengu ni ye O yezah pape cheni.

²³ Kükapumiqo no I mjochile niye küsüqe aghi namu, O qeu ye O yezahqo kümsüputho anani.

²⁴ O kükütsüqo ye I züküvüpu; tipaqo ye mijekütsümi ke.

²⁵ I ngulho no ayeghimkhu lo ihozü ani, O tsa kiqi lono I püxü tsülo.

²⁶ Kughou I no I laghiqo O vilo pi keno, Nono I khochile tsüe; O yezah I shika piyelo!

²⁷ I pelo O yezahqo vethalu pelo, eno I no Ow akümzapu kümlaqo kümsüputho nike.

²⁸ I ngulho ye amlo ghime lono pitipüha ayae, O tsa kiqi lono I shikumto tsülo!

²⁹ Akumou laghiqo I launo putosüve tsülo eno O yezah küpüqhiyi I shika tsülo!

³⁰ I no pükhükulu laghi kisheluvae; I no Ow pimheyeqo I zülo qhipüani.

³¹ O Ampeu, ni ye O kükütsüqo tsüqüpe ani; I pelo akukujo lo ilovepe kevilo!

³² Kughou Nono I mlo shikuloghi tsüni keno, I no O zakütsüqo laghi lo cheche nani!

³³ O Ampeu, O zakütsü laghiqo I shika tsülo; eno I no ashekha kutolo tipau papeni.

³⁴ Vethakulu I tsülo, tishiaye ni ye O yezah pelu nani eno I mlo kümtsü no tipau papelu nani.

³⁵ O zakütsü laghiqo lo I sachelo, kughengu ni ye tipau lono I züvülu cheni.

³⁶ Alakimne küakini lo amlotsü mono I mlo pelo O kükütsüqo lo amlo tsüqhiyi pelo.

³⁷ Ameküküha thimeqo juni keu lono I nhethi tsüghüve tsülo; eno O tsa kiqi lono I küxü pükhape qhitsülo.

³⁸ O qeu lau O shoqhi iqhikithe tsülo, tishikeu lono O sümsalu nani.

³⁹ Piküptha I no msa chekeu ikhive tsülo, kughengu Ow pimheyeqo ye akivi ke.

⁴⁰ Julo, ni ye O zakütsüqo khekulho shi ani; O chipiu mikucho vecheo I püxü tsülo!

⁴¹ O Ampeu, Ow iqemokeu kikimiye I lau ighi pelo, Ow tushokiqhi kiqi lono Ow xakulu I lau ighi pelo;

⁴² tishiaye I pipütha akemi lau ni ye khokichile anani, kughengu ni ye O tsa pükhü cheni.

⁴³ I kichi lono kuchou tsa qhoi ikhipe wuvetsü kevilo, kughengu Iw pükhükulu ye Ow pimheye lo anike.

⁴⁴ I no pülhapuju eno alholo O yezah ishokibe papeni,

⁴⁵ eno ni ye kuqhophe keu laghi lo ililai cheche nani, kughengu ni ye O kükütsütsa phuluvae.

⁴⁶ Kükami zülo I no O zakütsüqo pi nani ni ye akukujo lo ilovemo nani,

⁴⁷ kughengu ni ye O zakütsüqo lono I züküvü phulu cheni, ti ye I no kimiye ke.

⁴⁸ O zakütsü küdau I no I u peqhe ani, ti ye I no kimiye ke, eno I no O zakütsüqo lo kümsüputho anani.

⁴⁹ O qeu lau O tsa piqhi püakeu kümsü lulo, tipau lono Nono Iw lajupu tsüke.

⁵⁰ I ghime kitikhi lo I lokughuno ye hike, ti ye O shoqhi no aküxü I tsüke.

⁵¹ Aqheküzami no akiqheu lono I thaighae, ikemu ni ye O yezah lono tsüghüve moe.

⁵² Kughou I no khaghi lo Ow pimheyeqo kümsüju keno, O Ampeu, ni ye aloinolu cheni.

⁵³ Kixikilami, khunono O yezah pheve keno, tipau mlokighide kumqho huno I tsügha luve.

⁵⁴ I no kupokiche shichekeu kilo O yezah huno I lekungo shi ighivae.

⁵⁵ Putho lo I no O je kümsülu cheni, O Ampeu, eno O yezah pape cheni.

⁵⁶ Kükümgha hipau I shou ikughivae, ti ye I no O yezahqo pape ighivae.

⁵⁷ Ampeu ye I mheghi; I no O tsa pape nike ashoqhi shi ani.

⁵⁸ I mlo kümtsü no I no Ow kimiyekini qhüiniju ani; O shoqhi kiqi lono I lau küpüqhiyi tsülo.

⁵⁹ Kughou I no I laghiqo kümsükutoju keno, I no I pukhune süqhepe O kükütsü küdau ighi ani;

⁶⁰ O zakütsüqo pape niye I no mighi eno munuve moe.

⁶¹ Kixikilami kighi no I kitime anamu, ni ye O yezah kümsüma moe.

⁶² O mikucho pimheye ghenguno I no zübumta lo ghi idathughi no O sheqhe cheni.

⁶³ O sümsa eno O kükütsü pape chekemi kümtsü sasü ni ye shompami lakhi ke.

⁶⁴ O Ampeu, Ow iqemokeu kikimiye no ayeghiqha chhitoi ani; O khuayeqo I shika tsülo!

⁶⁵ O Ampeu, O tsa kiqi lono Nono O qeu peitha ke.

⁶⁶ Xakütha kivi eno akighithi I shika tsülo, kughengu ni ye O yezah pülü ani.

⁶⁷ Nono I ghime mphilo ni ye alaghi vepimive ke, ikemu itehi ni ye O tsa pape cheni.

⁶⁸ No ye aloe eno akivi shicheni; O zakütsüqo I shika tsülo.

⁶⁹ Aqheküzami no akimki pesü I juaje shipüsa cheni, ikemu I mlo kuchopu no ni ye O kükütsüqo pape cheni;

⁷⁰ pano mlo ye vethakulu kühae ikemu ni ye O yezah lo I züvülu cheni.

⁷¹ I ghimeqhi keu ye I ghenguno akivi ke, tishikeu lono I pelo O kükütsüqo papelu peniye ke.

⁷² O kichi lono pikeu yezah ye I ghenguno ameshoyi ngo ghükayi qhethonhe nguno akiviu ke.

⁷³ O u no ni lhoe eno I pesü kogheküghü kivi shi tsüe; vethakulu I tsülo eno ni ye O zakütsüqo shikalu nani.

⁷⁴ O sümsa chekeqo no ni ithulu no alovi nani, kughengu I no O tsa lo pükhübe ke.

⁷⁵ O Ampeu, I no ithi ani Ow pimheyeqo ye achipie, eno Nono pükhükulu lono I ghimeqhi ke.

⁷⁶ O qeu lau O shoqhi shikeu kiqi lono Ow iqemokeu kikimiye pesü I lokughuno tsülo.

⁷⁷ Ow kimiyekini I shou ikughi pelo, tishiaye ni ye xülu nani; kughengu O yezah ye I züküvüpu ke.

⁷⁸ Aqheküzami pelo akukujo lo ilove pelo, kughengu panongu ye kichile pesü I lau akumou shivae; ikemu I ghengu ye, ni ye O kükütsü lo kümsüputho nani.

⁷⁹ Khunono O sümsa cheni keno I lau tsüghü ighi pelo, tishino panongu pelo O kükütsüqo ithi penie.

⁸⁰ I mlo pelo O zakütsüqo lo tukutiye küha pelo, tishiaye ni ye akukujo lo ilovemo nani!

⁸¹ I ngulho no Ow xakulu khekulho shi ani; ni ye O tsa lo lajube ani.

⁸² I nhethi no O shoqhi khekulho shi ani; I no iniju, “No ye kughono I lokughuno tsüni kea?”

⁸³ Kughengu ni ye aji hughi amchhi lo akeu toivae, ikeghi ni ye O zakütsüqo kümsümave moe.

⁸⁴ Khitohi O qeu ye kutuuni kea? Kughono No ye I pishipiyi akeqo lau küghathani kea?

⁸⁵ Aqheküzami no I ghenguno aqo chhupe qhivae; panongu ye O yezah kiqi lono xü chemoe.

⁸⁶ O zakütsü kümtsü mtsümishei ke; panongu no akimki lono I pishipuju ke; I kuphu tsülo!

⁸⁷ Panongu ye ayeghi lono I pithiveni cheghi ke, ikemu ni ye O zakütsü pheve moke.

⁸⁸ Ow iqemokeu kikimiye vecheo aküxü I tsülo, tishiaye ni ye O kichi lono pikeu yezahqo papelu nani.

⁸⁹ O Ampeu, O tsa ye alholo kungugha lo acheni.

⁹⁰ O pükhükulu ye tiqheli kümtsü lo acheni; Nono ayeghiqha ghope qhi, ti ye mtotoi ani.

⁹¹ O zakütsü kiqi lono tipaqo ye ishi kutolo acheni, kughengu thokha kümtsü O qe ache keqo ke.

⁹² Tsala O yezah no I lokiqipu shi aghimo aye, ni ye I ghimekitikhi lono pühave aghini cheke.

⁹³ Ni ye khilemu O yezah kümsümave monani, kughengu tipaqo vecheo Nono aküxü I tsüke.

⁹⁴ Ni ye Ow ke; I xalulo kughengu ni ye O zakütsüqo gholu nike pükapütsa cheni.

⁹⁵ Kixikilami no I kütsave niye I ngokhe, ikemu ni ye O yezah lo kümsüpuku ani.

⁹⁶ Thokha kümtsü kihikütha akeu I no ithuluvae, ikemu O zakütsü ye ighono kijeke.

⁹⁷ O ni ye O yezah kishita kimiye kelae! Ti ye atsala kupuju I no kümsüputho achekeu ke.

⁹⁸ O zakütsü no I pelo I ghümi nguno alokütsüu shilupe, kughengu tipau ye alhokuthu I lolo acheni.

⁹⁹ Ni ye Iw shikükami nguno alau vethakulu ani, kughengu I no O kükütsü lo kümsüputho acheni.

¹⁰⁰ Layemi nguno ni ye vethakulu alau ani, kughengu I no O zakütsüqo pape cheni.

¹⁰¹ O tsa papelu nike ghenguno kixikilami laghi lono I no I pukhu süchile luve.

¹⁰² Ni ye O zakütsü lono tsüghüve moe, kughengu Nono I shika ke.

¹⁰³ O tsa ye I ghenguno kishita jumghai kela! I kichi lo akhingozü nguno ngonyi ke.

¹⁰⁴ O zakütsü vecheo ni ye vethakulu ithulue; tighenguno kichile laghi kümtsü I no mithi ke.

¹⁰⁵ O tsa ye I pukhu lo akulu eno I laghi lo aküvü lakhi ke.

¹⁰⁶ O mikucho pimheye pape nike I no ashoqhi lakhi shino tipau shikupu luvae.

¹⁰⁷ Ni ye shishe aghime shivae; O Ampeu, O tsa kiqi lono I püxü tsülo!

¹⁰⁸ Iw shekiqhe pulokini kümllagho ikhilu tsülo, O Ampeu, eno Ow pimheye I shikalo.

¹⁰⁹ I küxü ye alhokuthu aveküsa shi ani ikemu ni ye O yezah kümsüma chemoe.

¹¹⁰ Kixikilami no I ghenguno alichhe shipe qhivae ikemu ni ye O zakütsüqo lono vepimi wuve moe.

¹¹¹ O zakütsüqo ye lhokta kutolo I mheghi ke, kughengu tipaqo no I mlo lo alokivi süghi tsü cheni.

¹¹² Ashekha kutolo I mlo pelo O zakütsüqo papelu pelo.

¹¹³ Amlo kini kupumi ye I no mithi ke, ikemu ni ye O yezah kimiye cheni.

¹¹⁴ No ye I küghütshü-a eno I züto; O tsa lo I no lajube cheni.

¹¹⁵ I launo chevelo, nongu alhoksa kümlami, tishiaye ni ye I Lhou zakütsü papelu nani.

¹¹⁶ Ow tushokiqhi kiqi lono I sünhelu tsülo, tishiaye ni ye xülu nani, eno I no laju akelo I pelo kujovepe kevilo!

¹¹⁷ I sünhe puthulo, tishiaye ni ye sükusho anani eno alhokuthu O yezah gihu anani!

¹¹⁸ O yezah lono vepimi wuve kemi kümtsü Nono milive cheni, kughengu panow mqümgha ye adou ke.

¹¹⁹ Ayeghi lo kixikilami kümtsü Nono tübatüzü toi milive cheni, ikehu O kükütsüqo I no kimiye cheni.

¹²⁰ O msa kelauno I phi I shi no khokhoshi ke, ni ye Ow küghakütha msa cheni.

¹²¹ Kiu no achipi eno kuchou keno I no tipau shike; I qodaqhi ghime chekemi lau I phesüve tsü kevilo.

¹²² Tushokiqhi kivi lakhi O qeu tsülo; aqheküzami pelo I qodape kevilo!

¹²³ Ow xakulu eno O mikucho shoqhi shikupu penike I nhethi süküqü mono khekulho shi ani.

¹²⁴ Ow iqemokeu kikimiye kiqi lono O qeu peitha lo, eno O zakütsüqo I shika tsülo.

¹²⁵ Ni ye O qeu ke, vethakulu I tsülo, tishianguno ni ye O kükütsü ithi nani.

¹²⁶ Ampeu, Nono mla kepu do ighivae, kughengu O yezah ye kubovae.

¹²⁷ Tighenguno, ameshoyi nguno alau, ameshoyi kütsüghü nguno alau I no O zakütsüqo kimiye ke.

¹²⁸ Tighenguno ni ye O kükütsü kümtsü achipiu kepi kihi cheni; kichile laghi kümtsü I no mithi cheni.

¹²⁹ O kükütsü ye akümzapu; tighenguno I ngulho no tipaqo pape acheni.

¹³⁰ O tsa hephopiye keu no aküvü tsü cheni; tipau no akümthami lau vethakulu süghi cheni.

¹³¹ Ni ye O zakütsüqo khekulho shike ghenguno I kichi xükhope atuthu ghi kühave cheni.

¹³² Khunono O kimiye cheni keno pano lau tishi cheke toi, I lau tsüghü ighilo eno I küpüqhiyi tsülo.

¹³³ O shoqhi kiqi lono I pukhune jukuto tsülo, eno kiu kipimi pelomu I qhasü luvepe kevilo.

¹³⁴ I qhasüpe akemi launo I qhüchilelu tsülo, tishianguno I pelo O zakütsü papelu pelo.

¹³⁵ O qeu lau O gi yepüvü tsülo, eno O yezahqo I shikalo.

¹³⁶ I nhezü no aghoki toi qoani, kughengu timi no O yezah pape movae.

¹³⁷ No ye amikucho ke, O Ampeu eno Ow pimheyeqo ye achipi ke.

¹³⁸ O chipiu mikucho eno thokha lo pükhükulu lono Nono O kükütsüqo kutope qhie.

¹³⁹ I xukighide no I pitipüzaqhi, kughengu I ghümi no O tsa kümsümave ke.

¹⁴⁰ O shoqhi puju-peju luvae, eno O qeu no tipau kimiye cheni.

¹⁴¹ Ni ye akuchunimi eno thogha kemi lakhie, ikeghi ni ye O zakütsüqo kümsümave chemoe.

¹⁴² O chipiu mikucho ye alhokupuju achipi ke, eno O yezah ye kuchou ke.

¹⁴³ Aküküpna eno amlo kütakihi keu nono phuluvae, ikemu O zakütsü no I züküvüe.

¹⁴⁴ O kükütsü ye alholo lo achipi; vethakulu I tsü lo tishiaye ni ye xülu nani.

¹⁴⁵ I mlo kuchopu no O ku ani; O Ampeu, I khochile lo! I no O zakütsü papeni.

¹⁴⁶ I no O ku ani; I xalulo, eno I no O kükütsüqo papeni.

¹⁴⁷ Tsütho mphi lono I no ithu no kuphu peniye ighamku; I no O tsa lo lajube ani.

¹⁴⁸ I nhethi miyi mono puthotsü ngoe; tishino I no O shoqhi lo kümsüputho niye shike.

¹⁴⁹ Ow iqemokeu kikimiye lono I sütsa ini tsülo; O Ampeu, Ow kuchou xakütha lono I püxü tsülo.

¹⁵⁰ Küsakügha kimji lono I pishipiyi akemi no kupunu ighivae; panongu ye O yezah lono putosüpe ani.

¹⁵¹ Ikemu No ye kupunu ani, O Ampeu, eno O zakütsüqo ye kümtsü kuchou ke.

¹⁵² Khaghi no ni ye O kükütsüqo ithivae, Nono tipaqo pelo alhokupuju acheni peke.

¹⁵³ I ghime kitikhi ithulu tsülo eno I xalulo, kughengu ni ye O yezah kümsümave chemoe.

¹⁵⁴ I ghenguno xatha tsülo eno I qhüchile lulo; O shoqhi kiqi lono I püxü tsülo!

¹⁵⁵ Xakulu ye küsaküghami launo putou ani, kughengu panongu ye O zakütsüqo phuighi moke.

¹⁵⁶ Ow kimiyekini ye kije ke, O Ampeu; O shoqhi kiqi lono I püxü tsülo.

¹⁵⁷ I pishipuju kemi eno I ghümi kutomo ani, ikemu ni ye O kükütsü lono iqewuve chemoe.

¹⁵⁸ I no ayezah pemo kemi aphikümqhüpu shi juke, kughengu panongu ye O zakütsüqo pechemoe.

¹⁵⁹ I no kishi O zakütsüqo kimiye keno kümsü julo! Ow iqemokeu kikimiye lono I püxü tsülo.

¹⁶⁰ O tsa ye alhokuthu lo kuchou ke, eno Ow achipiu mikucho yezah ye alhokupuju acheni.

¹⁶¹ Kükapumi no kütsazü lono I pishipuju ke, ikemu I mlo ye O tsa msaqhiyi acheni.

¹⁶² Milakhi no aghüshi lono halelu keu ithulu akeshi, ni ye O tsa lo alokivi shi cheni.

¹⁶³ Ni ye kichile mithi eno aphimqhü cheni, ikemu O yezah ye I no kimiye.

¹⁶⁴ Ow pimheye achipiu ghenguno I no atsala lo ghuthu tsüni O sheqhe cheni.

¹⁶⁵ Khunono O yezah kimiye cheni keno aloino keu kije ani; kiu nomu pano pukhu küpxa lumo nani.

¹⁶⁶ O Ampeu, ni ye Ow xakulu pükhü ani, eno ni ye O zakütsüqo pape acheni.

¹⁶⁷ I ngulho no O kükütsüqo pape cheni; I no tipaqo shishe kimiye ke.

¹⁶⁸ I no O zakütsü eno O kükütsüqo pape cheni kughengu I laghi kümtsü O zülo ani.

¹⁶⁹ O Ampeu, I kighini O zülo ighi pelo; O tsa kiqi lono vethakulu I tsülo!

¹⁷⁰ I kukhu kighini O zülo ighi pelo; O tsa kiqi lono I xaphe tsülo.

¹⁷¹ I kichi lono O sheqheni, kughengu Nono O yezahqo I shika ke.

¹⁷² I kichi lono O tsa shipilini, kughengu O zakütsü ye kümtsü achipi ke.

¹⁷³ I kuphu kepu shi O u kutope ngo tsülo, kughengu I no O zakütsüqo kisheluvae.

¹⁷⁴ O Ampeu, ni ye Ow xakulu khekulho shi ani, eno O yezah ye I züküvü ke.

¹⁷⁵ I ngulho pelo xülu no O sheqhe pelo, eno Ow pimheye pelo I kuphu tsü pelo.

¹⁷⁶ Pühave keu mbe toi ni ye ala vepimivae; O qeu phu tsülo, kughengu ni ye O zakütsüqo kümsümave moke.