LESHELE 118 - Sumi Naga CL (Re-edited) Bible (BSI)

Paw Iqemokeu Kikimiye ye Alholo Acheni

¹ O shikimthi keu Ampeu tsülo, kughengu Pa ye aloe, kughengu Paw iqemokeu kikimiye ye alholo acheni!

² Israelmi no ishi pilo, “Paw iqemokeu kikimiye ye alhokupuju acheni.”

³ Aaron kibolomi pelo pipelo, “Paw iqemokeu kikimiye ye alhokupuju acheni.”

⁴ Khunono Ampeu sümsa cheni keno pano no pilo, “Paw iqemokeu kikimiye ye alhokupuju acheni.”

⁵ I ghime kitikhi lono I no Ampeu kuke; Ampeu no I khochile tsüno I khaqhiphe.

⁶ Ampeu ye I küdau ani; ni ye msamoe; timi no I lau kiu shikulupu kea?

⁷ Ampeu no I kukuphuu shi I küdau ani; I mithi chekeqo shou I no tokulu shi panoqo ju nani.

⁸ Timi shou pükhü akepu ye Ampeu ijeluve keu pavie.

⁹ Kükapumiqo shou pükhü akepu ye Ampeu ijeluve keu pavie.

¹⁰ Shiye kümtsü no I sümxape ani; Ampeu je lono I no panoqo kütsave.

¹¹ Panongu no I veho luve, aqha kümtsü lono I veho luve; Ampeu je lono I no panoqo kütsave.

¹² Panongu no akhi toi kutuqu pesü I veho luve; asahuli dolo ami iqü aketoi panongu no ighie; Ampeu je lono I no panoqo kütsave!

¹³ Mtotoi I tuhae, ikehu ni ye ikiqiuve cheghi, ikemu Ampeu no I kuphu tsüe.

¹⁴ Ampeu ye I kumto eno I lekungo ke; Pa ye Iw xakulu shivae.

¹⁵ Amikuchomi phiki loye xakulu lokivi lekungo acheni: “Ampeu u ajeu no akughushu shi mlavae.

¹⁶ Ampeu u ajeu no xaqhe ke, Ampeu u ajeu no akughushu shi mlavae!”

¹⁷ Ni ye thimo no xü nani, eno Ampeu kümla kümsülu nani.

¹⁸ Ampeu no mkamghai I ghasü ke, ikemu Pa ye akithi lo I phesüve moe.

¹⁹ Achipiu mikucho khagho lo I khaqhisü lo, tishiaye ni ye tipaqo vechesü ilolu no Ampeu shikimthi tsüni.

²⁰ Hi ye Ampeuw khagho; amikuchomi no tilehi ilo nani.

²¹ Nono I khochile tsüno I xalu kehu I no O shikimthi ani.

²² Aki kishimi no atu kileve keu huno kümtsü nguno atsükupuu shive.

²³ Hi ye Ampeu no mlatsüe; ningu nhethe lo hi ye akümzapue.

²⁴ Atsala hi ye Ampeu no mlatsüe; ningu alovi eno amlokiqi shini nolo.

²⁵ Nino inikhu ani, O Ampeu, ni xalu tsülo! O Ampeu, nino inikhu ani, tokulu ni tsülo!

²⁶ Khuu no Ampeu je lono cheni keno akümghapue! Ampeu ki lono nino O sheqheni.

²⁷ Ampeu ye Alhou ke, eno Pa no Pa küvü pesü ningu shou yepüvü tsüe. Tiqhetini ghakishi pesü akümlla-khache kibo lo phedalo!

²⁸ No ye I Lhou, I no shikimthi keu O tsüni; No ye I Lhou; I no O sheqheni.

²⁹ Shikimthi keu Ampeu tsülo, kughengu Pa ye aloe; kughengu Paw iqemokeu kikimiye ye alhokupuju acheni!