LESHELE 116 - Sumi Naga CL (Re-edited) Bible (BSI)

Ni ye Ampeu Kimiye Cheni

¹ Ni ye Ampeu kimiye cheni, kughengu kimiyeqhiyi tsü penike I no qhüiniju keu sütsa Pa no chilu tsü cheni.

² Kughengu Pa no Pa kini I lau kugho puwo tsüke, tighenguno I no xüake tivilo Pa ku anani.

³ Akithi lichhe no I sümxa luve; Kithigha kümsano I tsüqü luve; ni ye aghime kitikhi eno kütakihi keu no sakütüve.

⁴ Tileno I no Ampeu je kue: “I no inikhu ani, O Ampeu I xalulo!”

⁵ Ampeu ye küpüqhiyi, eno amikucho ke; ni Lhou ye kimiyekini ke.

⁶ Ampeu no alhoksa küha kemi süsho cheni; kughou I no aküighüpu lo ilove keno, Pa no I xalue.

⁷ O I ngulho, O kulhokiqhi-a lo ideighilo; kughengu Ampeu no nibonilei o lau mlave tsüae.

⁸ Kughengu Nono akithi lono I ngulho xaphe tsüke, I nhethi lono anhezü tavepe, I pukhu küpxalu kepu lono I xalue;

⁹ Ikehu küxümi yeghi lo ni ye Ampeu zülo cheche nani.

¹⁰ “Shishe I ghimevae” ipi I no pi püaghi namu I no Ampeu pülüke.

¹¹ Ni ye kichimamaive püzü “Timi kümtsü kimkimi ke” ipive ke.

¹² Pa no I la shitsü keu kümtsü ghenguno ni ye kiu pesü Pa tsüni kea?

¹³ I no xakulu jukhu peqheni eno Ampeu je kuni,

¹⁴ Paw timiqo kümtsü zülono I no I shoqhi Ampeu lau shikupuni.

¹⁵ Ampeu nhethe lo Paw akimthemi thive keu ye akughupu ke.

¹⁶ O Ampeu; ni ye o qeu; ni ye O qeu, O qeliu nu huke. Nono akütsügha lono I kuqhophe tsüke.

¹⁷ I no shikimthikütsü ghakishi O lau mllani eno Ampeu lau inikhuni.

¹⁸ Paw timiqo kümtsü zülono I no I shoqhi Ampeu lau shikupuni,

¹⁹ ti ye Ampeu ki bokütha lono tishini, O Jerusalem. Ampeu sheqhelo!