LESHELE 115 - Sumi Naga CL (Re-edited) Bible (BSI)

Ajuküvü pesü O Je Shilo

¹ Ni lau kumoe, O Ampeu, ni lau kumoe, ikemu ajuküvü pesü O je shilo, Ow iqemokeu kikimiye eno Ow pükhükulu ghenguno ke!

² Kushiye shiyeqo pelo ishi pi apeni kea, “Pano Lhou ye khile ania?”

³ Ni Lhou ye kungugha lo ani; eno Pa no pulo keu kümtsü shicheni.

⁴ Panoqo julho ye ghükayi ngo ameshoyi no mlakeu ke, timi u no mlakeu ke.

⁵ Panongu ye akichi ani, ikemu atsa pi chemoe; anhethi anie, ikemu ithulu chemoe.

⁶ Panongu ye akini ani, ikemu chilu chemoe; anigi ani, ikemu tsüngülu chemoe.

⁷ Panongu ye au ani, ikemu bulu chemoe; apukhu ani, ikemu chewulu chemoe; eno panongu ye pano kughoki lo kiu ghüghamu ighalu chemoe.

⁸ Khunono tipaqo mla cheni keno pano ghi tipaqo toive cheni; tihutoi tipaqo pükhü chekemi ghi tishive cheni.

⁹ O Israel, Ampeu pükhülo! Pa ye panoqo kukuphuu eno panoqo züto ke.

¹⁰ O Aaron kibolomi, Ampeu pükhülo! Pa ye panoqo kukuphuu eno panoqo züto ke.

¹¹ Nongu khunono Ampeu sümsa cheni keno, Ampeu pükhülo! Pa ye panoqo kukuphuu eno panoqo züto ke.

¹² Ampeu no ningu kümsülue; Pa no ningu kümgha tsü nani; Pa no Israel kibolomi kümghatsü nani; Pa no Aaron kibolomi kümghatsü nani;

¹³ Kitilami shi aghina kijemi shi aghi namu Ampeu sümsa chekemi ye Pa no kümghatsü nani.

¹⁴ Ampeu pelo nongu kughukotsü peniu, nongu ghi nongu tianuliqo ghi kümghatsü peniu!

¹⁵ Ampeu, atsütsü eno ayeghi pulhoküsüu pelo nongu kümghatsü peniu!

¹⁶ Kungugha ye Ampeuw kungugha ke, ikemu ayeghi ye Pa no timi nuliqo tsüvae.

¹⁷ Kithimi ye Ampeu sheqhelu chemoe, inaqhoike-a lo wuve kemi ye Ampeu sheqhelu chemoe.

¹⁸ Ikemu ningu ye itehi no huthusü pülhapuju Ampeu sheqheni. Ampeu sheqhelo!