LESHELE 112 - Sumi Naga CL (Re-edited) Bible (BSI)

Amikuchomi ye Ithavemo nani

¹ Ampeu sheqhelo! Khunono Ampeu gihu cheni, eno Pa zakütsü lo alokiqi shi cheni keno alokivipue!

² Pa tikughukomi ye ayeghi lo akughushu shi nani; amikuchomi tianuli ye kükümgha shi nani.

³ Küakini eno kinikülü ye pa kibo lo anani, eno pa chipiu mikucho ye alhokupuju ache nani.

⁴ Timi kivimi ghenguno aküvü no aküzü lo yepüvü tsü nani, pa ye küpüqhiyi, kimiyeqhiyi eno amikucho ke.

⁵ Khunono michhi mono pünakile cheni; pa kümla lo achipiu shicheni keno pa ye alokivipue.

⁶ Kughengu amikuchomi ye khilemu ithavemo nani; pa ye alhokuthu kütami no kümsü che nani.

⁷ Pa ye asütsa lhoksa msa chemoe; pa mlo ye mtotoi, Ampeu pükhübe cheni.

⁸ Pa no pa ghümi shou tokulu shikeu ithulu moke kutolo pa ye iqüghai cheni; pa ye msave chemoe.

⁹ Pa no ame lumono kümsano kijetsü cheni; pa no kumlhomi tsüke; pa chipiu mikucho ye alhokuthu acheni; pa kibo ye agigihu lono süqhe cheni.

¹⁰ Kixikilami no ti ithulu no amloide ani; pa ye ahu tsüghü no hauve cheni; küsaküghami no lajuqhiyi achekeu ye pühave nani!