LESHELE 111 - Sumi Naga CL (Re-edited) Bible (BSI)

Ampeu Kümla ye Kije

¹ Ampeu sheqhelo! Amikuchomi loji hoho lono I no I mlo kümtsü pesü shikimthi keu Ampeu tsüni.

² Ampeu kümlaqo ye kije ke, tipau lo azüküvü shikemi kümtsü no phikutho acheni.

³ Pa kümla ye ajuküvüpu ngo kükanguagha no chhitoi, eno Pa chipiu mikucho ye alhokupuju acheni.

⁴ Pa no Paw akümzapu kümlaqo kümsü lupe acheni; Ampeu ye küpükini eno kimiyekini ke.

⁵ Khunono Pa gihu cheni keno Pa no achuqupu tsü cheni; Pa no Paw puloshoqhi alholo kümsülu cheni.

⁶ Pa no Pa kümla küka Paw timiqo lau piye, ti ye shiyeqo mheghi pesü panoqo tsüke.

⁷ Pa u no mlakeu kümtsü pükhükulupu eno achipi ke; Pa zakütsü kümtsü pükhübekulu ke;

⁸ tipaqo ye pülhapuju eno alholo ache nani, tipaqo ye pükhükulu eno amikucho vecheo shi ache nani.

⁹ Pa no Paw timiqo lau qhüchilekulu tsüke; Paw puloshoqhi ye alholo ache penike Pa no azah tsüe. Pa je ye akimthe eno akümzapu ke!

¹⁰ Ampeu sükümsa ye alokütsü boqha ke; khunono tipau pape cheni keno vethakulu kivi ani. Pa shekiqhe ye alhokupuju ache nani!