LESHELE 109 - Sumi Naga CL (Re-edited) Bible (BSI)

I Kuphulo, O Ampeu

Davidw Leshele

¹ I no sheqhe chekeu Lhou, inaqhoi auve kevilo!

² Kughengu kixikila eno pishikiqhi kichi xükhope I lachile ani, akimki mili no I shou atsa pipuku ani.

³ Akimthipu tsa no I sühope ani, eno kütsazü shi I ghime ani.

⁴ Iw kikimiye züqhulo panongu no I nguku ani, ikemu ni ye panongu ghenguno inikhu ani.

⁵ Ikehu panongu no akivi züqhulo alhoksa eno Iw kikimiye züqhulo akimthipu pesü I tsüchile ani.

⁶ Pa lachile penike kixikilami lakhi süküsü shilo; nguku akeu pelo pa u ajeu puthugho pelo.

⁷ Kughou pa sasü atsa küghani keno, pa pelo akipimi xapuve pelo; pa kighini ye axine toi kihive tsülo!

⁸ Pa küxü kughukhove tsülo; kütami pelo paw hiyam peitha luve pelo!

⁹ Pa tianuli pelo mighimi shive pelo, eno pa nipu ye chimemi shive pelo!

¹⁰ Pa tianuli pelo kupokiche shi khuchu wuve pelo; panongu no ixapinyi ke-a lo xü akeu nguno putou achuqupu phuwu pelo!

¹¹ Apiagha tsükepu shi akemi pelo pa no pighi akeqo kümtsü pewuve pelo; inami pelo pa no mlasü keqo xathi xule puwuve pelo.

¹² Timi khuu pelomu pa lau kikimiye pephepe kevilo, momu khuu pelomu paw mighimi nuli kimiye pekevilo!

¹³ Pa tikughukomi hapheve tsülo; tiqheli akiniu lo ye pa je nuxave tsülo!

¹⁴ Pa puasüqo kipimi ye Ampeu zülo kümsülu ache pelo, eno pa za xine ye nuxa pühave tsü kevilo!

¹⁵ Tipaqo ye Ampeu zülo alhokuthu apelo, tishikeu vecheo Pa no ayeghi lono panoqo kümsümave penike hapheve nani.

¹⁶ Kughengu pa ye kikimiye pephe piyeni keu kümsümave ke, ikemu athokhami, akukuphu avehupu shi akemi eno amlo ghujumi pithiveni ye hasüwu ke.

¹⁷ Pa ye ghushoni keu kimiye; müsüinive keu pa shou ikughive pelo! Pa ye kümgha tsüni keu mithi; kükümgha ye pa launo putosüve pelo!

¹⁸ Pa no aphimini pepu ketoi ghukusho pepuke; ghukusho no azü toi pa phiau pütsü luve pelo, thazü toi pa ghi-anhü pütsü luve pelo!

¹⁹ Tipau pelo pa no aphimini vehopu akeu toive pelo, tsalakipe pa no apokha khapu chekeu toive pelo!

²⁰ Khunono I lachile ngukube ghi kixikila tsa pi keno tipaqo lau hino Ampeu launo ighikeu saxü shipelo!

²¹ Ikemu O Ampeu I Lhou, O je ghenguno Nono I züqhulo mla tsüke; kughengu Ow iqemokeu kikimiye ye aloke, I xalulo!

²² Kughengu ni ye kumlhomi eno akukuphu avehupu shi akemi, I mlo ye alouno izapusü ani.

²³ Avelau yekükhü toi ni ye hauveni cheae; ni ye tülhaqu toi sükini qhivae.

²⁴ Kümvü keu vecheo I khonhe ye qeinaivae; I phiau ye atha küha no ayiko no aghi küzü luvae.

²⁵ I ngukube akeqo lau ni ye küthaküghapu thime shivae; kughou panongu no ni ithuluni keno, pano kütsü küngüe.

²⁶ I kuphulo, O Ampeu I Lhou! Ow iqemokeu kikimiye vecheo I xalulo!

²⁷ Hi ye O u kepi panoqo pelo ithi pelo; O Ampeu, Nono hipau shive ake.

²⁸ Panongu pelo ghusho apelo, ikemu Nono kümghatsü nani! Panongu no ithughi kelo kujove pelo, ikemu O qeu ye alovi nani!

²⁹ I ngukube akeqo pelo akukujo pepuve pelo; pano kukujopu no hebephi pepu akeshi pano küzüluve pelo!

³⁰ I kichi lono I no shikimthi keu kije Ampeu tsüni; I no aqokitikhi gholono Pa sheqheni.

³¹ Kughengu Pa no akukuphu avehupu shi akemi u ajeu puthugho cheni, ti ye pithive peniye küghathave kemi Pa no xalu niye ke.