LESHELE 108 - Sumi Naga CL (Re-edited) Bible (BSI)

Alhou Vecheo Amlo Mto nani

Davidw Leshele

¹ I mlo ye iqemoe, O Alhou! I no ale pheni eno I küxü kümtsü pesü inikivile pheni!

² Ithulo, O akighilebo eno küghaküsü lebo! I no tsükutho küda puthuni!

³ Timiqo gholo I no shikimthi keu pesü O tsüni, O Ampeu; shiyeqo gholo I no O lau shekiqhe le pheni.

⁴ Kughengu Ow iqemokeu kikimiye ye kungugha nguno qhemghai kije; Ow pükhükulu ye atsütsü to ani.

⁵ O Alhou, kungugha shou akughushu shilo! Ayeghiqha kümtsü shou O juküvü alupe lo!

⁶ Tishiaye O mlo kuchumi ye xaluve nani, O u ajeu vecheo xakulu tsü lo eno I khochile lo!

⁷ Alhou no Pa kimthe vecheo tushoqhivae: “Ajekipishi I no Shechem kijeni eno Succoth Khila kothaphe luve nani.

⁸ Gilead ye Iw; Manasseh ye Iw ke; Ephraim ye I kütsü kuqhoe Judah ye I yekipe küsü ke.

⁹ Moab ye I u kümtsü-a ke; Edom shou I no I pukhu kuqho bepeqhi ke; Philistia shou I no aghüle kuke.”

¹⁰ Khuu no putukha püakeu mishighüna lo I sailoni kea? Khuu no Edom lo I sailoni kea?

¹¹ O Alhou! No ye ningu milive ake kumo keshea? No ye niw ghüshimi sasü wumovae, O Alhou.

¹² Aghümi lachileni ke akukuphu ningu tsülo, kughengu timi kukuphu ye amekühae!

¹³ Alhou vecheo ningu ye amlo kumto shinani; ni ghümi qodaveni keu huye Pa ke.