LESHELE 107 - Sumi Naga CL (Re-edited) Bible (BSI)

Qhüchileluve Kemi no Pilo

¹ Shikimthi keu pesü Ampeu tsülo, kughengu Pa ye aloe, Paw iqemokeu kikimiye ye alhokupuju acheni!

² Ampeu no qhüchile luve kemi no pilo, Pa no aghime lono khunoqo qhüchilelu keno,

³ akuaqha kütüta, kipelau eno kulolau, ahuu eno apeu no hekütsü saghi kemi no pilo.

⁴ Khami ye asayeli lo itsüsü küghünalu kepu mishighüna laghi kiumu phulu moe;

⁵ müzüthi eno tüghüthi no, panoqo küxü ye thiveni ketoive.

⁶ Tithiu panoqo ghime lono panongu no Ampeu lau qae, eno panoqo ghime kitikhi lono Pa no panongu xaphe luve.

⁷ Panongu no ilo küghüna kepu mishighüna tolu moke kutolo Pa no alaghi kümzü lono panoqo sasü wue.

⁸ Paw iqemokeu kikimiye ghenguno, Paw akümzapu kümla timi nuliqo lau mlakeu ghenguno panoqo pelo Ampeu shikimthi pelo!

⁹ Kughengu Pa no mlominyi keu ngulho ghapiqitsü cheni, eno Pa no thime kiviqo pesü müzü-tüghü shikeu ngulho shepichhi tsü cheni.

¹⁰ Khami ye aküzü eno akithi yekükhü lo iqae, aghime eno ayikichhe lo akughumi shi ache,

¹¹ kughengu panongu no Alhou tsa lachile hebide ke, eno shishe Akiqheu kükütsü milive ke.

¹² Panongu ye aka-agha shi mlakeu lono pano mlo ijuve; panongu ye ikiqive kemu khuu nomu kuphu tsümoe.

¹³ Tithiu pano ghime lono panongu no Ampeu lau qae, eno pano ghime kitikhi lono Pa no panoqo xaphelue.

¹⁴ Pa no aküzü eno akithi yekükhü lono panoqo saipeghi, eno akütsüghaqo sütha kütüta shive tsüe.

¹⁵ Paw iqemokeu kikimiye eno Paw akümzapu kümla timi nuliqo lau mla keu ghenguno panoqo pelo Ampeu shikimthi pelo!

¹⁶ Kughengu Pa no alazayi hukikhaqo kubove tsü, eno ayi khadu hephove tsüe.

¹⁷ Khami ye pano xine laghiqo vecheo mbomzü shive, eno pano kipimi vecheo aghime shi süve;

¹⁸ panongu ye achuqupu jeli kümtsü aphimqhüe eno akithi khaghoqo kupunu ighive.

¹⁹ Tithiu pano veküsa lono panongu no Ampeu lau qae, eno pano ghime kitikhi lono Pa no panoqo xaphelue.

²⁰ Pa no Pa tsa piqhi eno panoqo shipivi tsüe, eno kütsakungo keu lono panoqo xaphelue.

²¹ Paw iqemokeu kikimiye eno Paw akümzapu kümla timi nuliqo lau mlakeu ghenguno panoqo pelo Ampeu shikimthi pelo!

²² Eno panoqo pelo shikimthikütsü ghakishi mlla pelo, eno alokivi le vecheo Pa kümlaqo pitsü pelo.

²³ Khami ye zükilu lono azüghi lo wuve eno azüghizü kije lono lhidi shike;

²⁴ panongu no Ampeu kümlaqo ithulu, azüghi kutho lo Paw akümzapu kümlaqo ithulu.

²⁵ Kughengu Pa no pasapagha mülhü azah tsüno ithughipe cheni, tipau no azü fukucho ikughipe cheni.

²⁶ Tipaqo ye naghuto shou ikughive cheni; tipaqo ye akuthoku lo ilove cheni; hikithipu kümsapu lo timi no amlo hauve cheni

²⁷ panongu ye shokümzümi toi khokhoshi eno nanashi ke eno panoqo lokütsü ye ashekha shive.

²⁸ Tithiu panongu no aveküsa lono Ampeu lau qae, eno Pa no aghime kitikhi lono panoqo xaphelu.

²⁹ Pa no pasapagha pelo iqünhei ngovepe, eno azüghi zü fukukucho pelo inaqhoi ngovepe.

³⁰ Tithiu azü no iqünheive kelo panongu ye alokivi shive, eno panoqo no kümsü pulo ake-a lo Pa no sasü ighi ke.

³¹ Timi nuliqo lau Paw iqemokeu kikimiye eno akümzapu kümlaqo ghenguno panoqo pelo Ampeu shikimthi pelo!

³² Panoqo pelo timi kuho kumqo akelo Pa süqhe pelo, eno layemi hoho lo Pa sheqhe pelo.

³³ Pa no aghokiqo pesü asayeli kughulhove tsü, azüpukiqo pesü atüghü yeghi shive tsü,

³⁴ aghüma yeghi pesü amti yeghi shive tsü, tipau lo küghüna akeqo lhoksa ghenguno ke.

³⁵ Pa no asayeqha pesü ayizükucho shivetsü, qhaike yeghi pesü azüpuki shivetsü.

³⁶ Eno Pa no müzüthi keqo pelo tilehi küghünape, eno panongu no tilehi küghüna nike mishighüna lakhi shiqhe;

³⁷ panongu no aluza lo athi xusü eno atsaibo shosü eno ghile kivi hulue.

³⁸ Paw kükümgha vecheo panongu ye shishe kughuko luve, eno Pa no panow pichepighi lhoxü mpive pemoe.

³⁹ Kughou ayiküsa shi qodaqhi keu, küsakügha eno aghimeqo vecheo panongu küxü ye hailove eno aqhou iqighiveni keno,

⁴⁰ Pa no kükapumiqo shou küthakügha lepuku cheni eno Pa no panoqo pelo ala kühakeu asayeli lo aveghüzü shiuvepe cheni;

⁴¹ ikemu aghime lono Pa no akukuphu avehupu shi akemi sünheqhe eno pano kibolomi pesü ambeloji toilu peke.

⁴² Süchomi no ti ithulu no alovi, eno kixikilami no pano kichi kujukha luve.

⁴³ Khukhumu alokütsümi no thime hipaqo kümsükutoju alo; panoqo pelo Ampeuw iqemokeu kikimiye kümsükutoju apelo.