LESHELE 106 - Sumi Naga CL (Re-edited) Bible (BSI)

Shikimthi keu Pesü Ampeu tsülo

¹ Ampeu sheqhelo! Shikimthi keu pesü Ampeu tsülo, kughengu Pa ye aloke, Paw iqemokeu kikimiye ye alholo acheni!

² Khuu no Ampeuw akümzapu kümlaqo pilu, momu Paw shekiqhe asheshu khakulupu kea?

³ Khuu no kuchou xakütha ikhilu, eno atüqhüdo kümtsü lo achipiu mikucho shicheni keno pano lokivipue!

⁴ Kughou Nono Ow timiqo lau Ow kikimiye piyeni keno I kümsülu lo, O Ampeu; Kughou Nono panongu xaluni keno, I kuphu tsülo,

⁵ tishianguno Ow kishekiphemi no nibonilei lukeu I no ithulu nani, Ow shiye no alovi keu lo ni ghi aloqilu nani, O mheghi gholo I no akijivilelu nani.

⁶ Ningu eno ningu puasüqo ghi axine shivae; ningu ye akipimi shivae; ningu ye küsakügha shivae.

⁷ Kughou ningu puasüqo no Egypt lo ache keno, panongu ye Ow akümzapu kümlaqo kihiju moe; panongu ye Ow iqemokeu kikimiye kupukuno shi akeu kümsülu move, ikemu azüghi, Akuhu Züghi lo cheche kelo panongu no hebideve.

⁸ Ikeghi Pa no Pa je lono panoqo xaluve ke, tishikeu lono Pa no Paw akughushu küka pephe piye niye shike.

⁹ Pa no Akuhu Züghi lomipi, eno tino thoqhaive, eno asayeli lo cheche ketoi Pa no panoqo sasü azüghi kathawu ke.

¹⁰ Tihutoi Pa no aghümi u lono panoqo xaluve, eno aghümi küka lono panoqo qhüchile luve.

¹¹ Eno azü no pano ghümi pütsüqhive; panoqo dolo lakhimu ghülu moe.

¹² Tithiu panongu no Pa tsa pülüve; panongu no Pa shekiqhe lephe.

¹³ Ikemu panongu no paikhavi lono Pa kümlaqo kümsümave; panongu ye Paw shiküka ngokhe move!

¹⁴ Ikemu yenguyike-a lo panongu ye ghasükümla shi mihemzaive, eno asayeli lo Alhou ghükeju keu shive;

¹⁵ Panoqo no kiu khu keno Pa no tsüe, ikemu aghime küsü lakhi panoqo lau puwu ke.

¹⁶ Kughou aghazü lo timiqo no Moses ngo Aaron, Ampeuw timi pama ju anheshuve keno,

¹⁷ ayeghi no akichi xükho no Dathan muno süve, eno Abiram lojimi küzüluve.

¹⁸ Panoqo ghazü lono ami iqü ipeghive; amiküiqü no kixikilami pitive.

¹⁹ Panongu no Horeb lo amshitsü julho mla eno ayi julho mllae.

²⁰ Panongu no Alhou juküvü pesü amshitsü atsüni mzachu chekeu sasü kilive.

²¹ Panongu no Alhou, pano Xakuluu, khuu Egypt yeghi lo thime kije mla,

²² Ham yeghi lo akichiqhipu kümla shi eno Akuhu Züghi lo akümzapu kümlaqo mla keno Pa kümsümave ke.

²³ Tighenguno Pa no panoqo kütsaveni ipi— Paw kishekiphe qeu Moses no Pa zülo puthugho moke aye, Pa loghu no panoqo kütsave niye akeu süchile mlani cheke.

²⁴ Tithiu panongu no ayeghi chhigha kivi jukünatha no, eno Pa shoqhi lo pülübe moe.

²⁵ Panongu no pano phiki lono muchho, eno Ampeu tsa gholu moveke.

²⁶ Tighenguno Pa no Pa u süqhe no panoqo vilo tushoqhive eno Pa no panoqo pelo yenguyike-a lono thivepe,

²⁷ eno pano tikughuko pelo shiye zülo ikiqivepe no ayeghi lo kutholeve ke.

²⁸ Tithiu panongu no Peor lo Baal sasü kuokhasü lakhi shive, eno kithimi lau aghakishi mllave keu chusho;

²⁹ panongu no pano kümla vecheo Ampeu mlo shikighide, ikehu püsa lakhi panoqo dolo ighive.

³⁰ Tithiu Phinehas no puthugho no inikhu tsü, eno püsa ghasü luve.

³¹ Tipau no Pa pesü achipiu mikucho kepi tiqheli lono tiqheli kutolo alholo kihive.

³² Panongu no Meribah züpuki lono Pa mlo shikighideve tsü, eno pano kipimi tipau ghenguno Moses lau aküpüna shive,

³³ kughengu panongu no pa ghungu pelo kukhukimji shivepe, pa ye pa kichi ghakütsü mlave no pai atsa piqhive ke.

³⁴ Panongu ye Ampeu no panoqo azah tsüke toi, timiqo kütsa khamove ke,

³⁵ ikemu shiyeqo sasü kitekungo xüuve eno panongu no shiche keqo shika luve.

³⁶ Panongu no pano julhoqo qeuve, tipau no panoqo ghenguno alichhe lakhi shive.

³⁷ Panongu no pano nuliqo eno pano ngaqo pesü tüghaküsa lau aghakishi shive;

³⁸ panongu no pimihami ji pele, ti ye pano nuli eno pano ngaqo ji, khikhi panongu no Canaanmi julhoqo lau aghakishi shive keno tipau ke, eno ayeghi ye aji vecheo shikitiqeve ke.

³⁹ Ikehu panongu ye pano kümlaqo vecheo mithe move, eno pano kümlaqo sasü kütüqhauve ke.

⁴⁰ Tithiu Ampeu mlokighide ye Paw timiqo shou iqü ipeghive, eno Pa no Pa mheghi jumithive;

⁴¹ Pa no shiyeqo u lo panoqo pephe tsüve, ikehu pano mithi chekemi no pano shou ayepeuve.

⁴² Pano ghümi no pano qodaqhi, eno panongu pesü pano küka qholo qhive.

⁴³ Ghuthu kutomo Pa no panoqo xaphelu, ikemu panongu ye hebideni keu kisheluve eno panoqo kipimi vecheo panoqo sünheqhive.

⁴⁴ Tishinamu, kughou Pa no panoqo küqa chilu keno Pa no panoqo ghime kitikhi ithulu tsüe.

⁴⁵ Panoqo ghenguno Pa no Paw puloshoqhi kümsüchilelu, eno Paw iqemokeu kikimiye kupukuno akeu vecheo Pa no aghime tsüni keu lono süchileve.

⁴⁶ Panoqo khathape akughu shikemi kümtsü zülo Pa no panoqo kimiyevepe.

⁴⁷ Ni xalulo, O Ampeu ni Lhou, eno shiyeqo dolono ningu hekütsü tsülo, tishiaye ningu ye O kimthe je lono shikimthi keu tsülu nani eno O sheqhe keu lono ajuküvü shilu nani.

⁴⁸ Israel Lhou Ampeu sheqhelo, Pülhapuju lono pülhapuju kutolo! Eno timiqo kümtsü pelo, “Amen!” ipi pelo. Ampeu sheqhelo!