LESHELE 105 - Sumi Naga CL (Re-edited) Bible (BSI)

Paw Akümzapu Kümla Kümtsü Pilo

¹ Shikimthi keu Ampeu tsülo; Pa je sheshulo; ashiayeqo pelo Pa kümla ithi pelo!

² Pa lau ale phelo, shekiqhe le Pa lau phelo; Paw akümzapu kümla kümtsü pilo!

³ Pa kimthe je lono ajuküvü shilo; Khunono Ampeu phucheni keno panoqo mlo pelo alovi pelo!

⁴ Ampeu eno Pa küka phulo; tamono Pa zülo wuni keu phulo!

⁵ Akichiqhipu kümla Pa no mla keqo, Paw akümzapu eno Pa no piqhikeu küghaküthaqo kümsülu lo.

⁶ O Abraham tikughukomi, pa qemiqo, Jacob nuli, Pa no kisheluve keqo!

⁷ Pa ye Ampeu ningu Lhou ke; Paw küghakütha ye ayeghiqha kümtsü lo ani.

⁸ Pa ye alholo Paw puloshoqhi, Pa no azah tsükeu tsa tiqheli qhethonhe kutolo kümsülu cheni,

⁹ ti ye Pa no Abraham sasü puloshoqhi shikeu, Isaac lau Paw tushokiqhi shoqhi shikeu ke.

¹⁰ Pa no xaküthaza shi Jacob lau iqhikithe no Israelmi lau pülhapuju puloshoqhi shike,

¹¹ eno pi, “I no hi Canaan yeghi, amheghi shi nongu saje shi tsüni.”

¹² Kughou panongu no akikihi aghulo likhi shi ache, eno inami shi tile ache keno

¹³ shiye lakhi lono shiye lakhiu lo, kükaqha lakhi lono kükaqha lakhiu lo itsüche keno,

¹⁴ Pa no khuu pelomu panoqo kijipüsa pemoe; Pa no panoqo süsho niye kükami lomipi no,

¹⁵ pi, “I no nukisheve kemi bukevilo, Iw tungkupmi ghüza kevilo!”

¹⁶ Kughou Pa no ayeghi lo püqümiye lakhi puwu eno achuqupu ikighi laghi kümtsü lakhave tsü keno,

¹⁷ Pa no timi lakhi panoqo züuno puwu, ti ye Joseph, pa ye aqemi lakhi shi jepuwuve ke.

¹⁸ Pa pukhu ye ayikichhe no ghüzave, kuokhayi pesü pa kuo veho pipe;

¹⁹ ti ye Pa no azünatha pikeu shikupu moke kutolo, Ampeu tsa no pa peju ke.

²⁰ Akükau huno timi puwu eno pa khaqhi pheve; timiqo shou akükau no pa pheve.

²¹ Pa no Joseph pelo pa kibo shou ampeu eno pa no pighi akeqo kümtsü shou yepeu shivepe,

²² pa pulou lono sakiphemi tsüghave eno paw layemi alokütsü shika peke.

²³ Tithiu Israel no Egypt lo ighi; Jacob ye Ham yeghi lo kupokichemi shive.

²⁴ Eno Ampeu no paw timiqo ighono ikoishe lupe eno panoqo pelo pano ghümi nguno akumtou shilupe.

²⁵ Pa no panoqo mlo tukidepe Paw timiqo mithipe no, mqümgha shi Pa qemi peithape.

²⁶ Pa no Pa qeu Moses, eno Aaron, khuu Pa no kishelu keno pama puwu.

²⁷ Pama no panoqo lau Paw amchipu pephe piye eno Ham yeghi lo akümzapuqo mlae.

²⁸ Pa no aküzü puwu, eno ayeghi pesü zümoive tsü; panongu no Pa tsa gholu moe.

²⁹ Pa no panow azü pelo aji ilhovepe eno panow akha pithive tsüe.

³⁰ Pano yeghi ye achuyi no nhakhave, kükami chebo lo ghi tipaqo no chhitoive.

³¹ Pa no azah tsükelo amiyi no taighive, eno amthuqo no pano ghakhu kupuju nhakhave.

³² Tsütsüghu züqhulo Pa no apüghü tsüe, eno pano ghakhu kümtsü lo tsütsüpha kukulo puwu.

³³ Pa no panoqo tsaibo ngo mububo kütsavepe, eno pano ghakhu lo asüboqo vethapinyive tsü.

³⁴ Pa no azah tsükelo tülhaqu no taighive, tülhaqu kihikhakümla ighive,

³⁵ tipaqo no ayeghi lo atsüni kümtsü kütsave eno pano chhigha lo axathi kümtsü chukhave.

³⁶ Pa no pano yeghi lo anoghiu eno, pano küka kumto xathi amsüu kümtsü pithive tsü.

³⁷ Tithiu Pa no Israelmi saipeghi no ghükayi eno ameshoyi xapu wuvepe eno Pa shiayeqo dolo ashiaji khokhoshi kemi khumu kühae.

³⁸ Kughou panongu no wuve keno Egyptmi no alovi, kughengu akümsa no panoqo shou ikughive ke.

³⁹ Pa no khüngküsü pesü panongu nhape eno putho lo ami no panongu küvü shitsüe.

⁴⁰ Panongu no khu kelo Pa no atsüngü puwu tsü, eno kungugha lono achuqupu kupukuno shi panoqo tsü.

⁴¹ Pa no atuqu lhaphe kelo azü no qoipeghi; tino aghoki toi asayeqha lo qowu.

⁴² Kughengu Pa no Abraham, Pa qeu, eno Pa kimthe shoqhi kümsülu ke.

⁴³ Ikehu Pa no alokivi shi Paw timi saipeghive, Pa no kishelu kemi sasü alephe ghi ipeve.

⁴⁴ Eno Pa no shiyeqo yeghi panoqo tsü, eno timiqo ghime xathi panongu pelo luvepe,

⁴⁵ tishianguno panongu pelo Pa zakütsüqo qhilu eno Pa yezah pape peniye ke. Ampeu sheqhelo!