LESHELE 104 - Sumi Naga CL (Re-edited) Bible (BSI)

O Ampeu , No ye Ighono Kije

¹ Ampeu sheqhelo, O I ngulho! O Ampeu I Lhou, No ye ighono kije! No ye ajekipi eno ajuküvü pepu ani,

² aküvü pesü O küzüpu ani, Nono aphiki toi kungugha xakho ke.

³ Pa no azü lo Pa chebo tsükucho ghope qhi; Pa no khüngküsü pesü Paw khurkulu shi; Pa no amülhü chishibo shou iqa no chewu,

⁴ Pa no amülhü pesü Pa tsapemi shi, amiküiqü pesü Pa qemi shike.

⁵ Pa no mtotoi ayeghiqha boqha ghopüani, tishikeu lono ti ye khilemu ithamo nani.

⁶ Nono akuthoku pesü aphimini toi tipau nhapüani, azü no naghutoqo shou ani.

⁷ Nono sakiyi kelo tipaqo no pove cheni; Ow tsütsüküsü ghügha lono panongu no kuhave cheni.

⁸ Nono tipaqo ghenguno kutope qhipüa keqo-a lo naghuto no qhemghai ikughive eno akhila no thonhei ilove.

⁹ Nono tipaqo pelo veche pemo niye alughi shotsüe, tishikeu lono tipaqo pelo itaghi ayeghi küzü luve pemoe.

¹⁰ Nono akhila lo azüpuki qoipeghipe, tipaqo no naghutoqo dolono qowue;

¹¹ tipaqo no aluza lo tüghashiqo azü tsüe; aghalo khurhaqo pelo pano tüghü ghasülu peke.

¹² Tipaqo phivi lono atsütsü lo aghauqo no ngolu cheni; tipaqo no asübo lokaqo dolo no ale pheke.

¹³ O kungo-a chuqumghaike lono Nono naghutoqo shou ghuqhi tsüe; ayeghi no Nono mlakeu xathi vecheo aghapiqi lue.

¹⁴ Nono pichepighi ghenguno asütsüni thuwu ipeghipe, eno timi pelo sübotsüni chilupe, tishikeu vecheo panongu pelo achuqupu ithulupe

¹⁵ eno atsaizü no timiqo mlo lopivi tsü, thazü no timiqo gi vüqai lupe eno timi mlo shikumto tsüniye asho tsüke.

¹⁶ Lebanon lo cedar süboqo khikhi Pa no shosü keno, Ampeu süboqo ye kupukuno shi azü tsüe.

¹⁷ Tipaqo lo aghauqo no pano püsü pesü; azüghau no fir sübo lo pano kungoki acheni.

¹⁸ Naghuto qhemghai keqo ye aghalo aneqo ghenguno ke; atuquqo ye achighiqo ghenguno sükusho lakhi ke.

¹⁹ Atushoqo amichi shiniye Nono aqhi lhophe tsü, khetsünhe no iloveni keu do ithi ani.

²⁰ Nono aküzü mlae, tino putho, ti ye aghasa lo tüghashi kümtsü no ipu-itsa igha keu doke.

²¹ Abongshuu lhotheqo no tsüqhi chunike igha, Alhou launo pano chuqupu phucheni.

²² Kughou khetsünhe ipeghini keno, panongu ye idewove cheni eno pano küghütshü-a lo züuve cheni.

²³ Tithiu timi no pa kümla shiniye wuve cheni eno avela kutolo ime mla cheni.

²⁴ O Ampeu, O kümlaqo ye ta khijehi kelae! Alokütsü lono Nono tipaqo kümtsü mlake; ayeghiqha ye Ow lhoxüqo no chhitoi ani.

²⁵ Azüghi kije eno kuloghi hi ani, tile lhoxü kihikhakümla tahu-tawo ani xüakeu lhoxü kije ghi kitila ghi ani.

²⁶ Zükilu no tipau shou no wu, eno tile Leviathan, khikhi Nono pulhosü keno tilehi ili cheni.

²⁷ Atusho kiqi lono achuqupu pano tsü peniye hi kümtsü no O lau ju acheni.

²⁸ Kughou Nono panoqo tsüni keno panongu no tipau hekütsü cheni; kughou Nono O u xükhoni keno panongu ye thime kiviqo chhitoive cheni.

²⁹ Kughou Nono O gi küsüveni keno, panongu ye aghüthisüve cheni; kughou Nono panoqo tuthu ikhiluveni keno, panongu ye thive cheni eno ayeghimkhu shive cheni.

³⁰ Nono O Ghungu puwu kelo panongu lhophe cheni, eno Nono aküxü kithe ayeghi lo tsü cheni.

³¹ Ampeu juküvü no alholo ache pelo! Ampeu pelo Pa kümla lo alovi pelo.

³² Pa no ayeghi shou jupuku kelo tino khokhoshi itha; Pa no naghuto bu aye, tipaqo no amchhi phopipe cheni!

³³ I no xüake tivilo ni ye Ampeu lau alephe nani; I no aküxü ake tivilo ni ye I Lhou shekiqhe le pheni.

³⁴ Iw kümsükutho Pa lau ikhikulupu shipelo, kughengu ni ye Ampeu lau alovi cheni.

³⁵ Ayeghi lono axinemi piti pühave pelo, eno kixikilami kühave pelo! Ampeu sheqhelo, O I ngulho! Ampeu sheqhelo!