LESHELE 103 - Sumi Naga CL (Re-edited) Bible (BSI)

Ampeu Sheqhelo, O I Ngulho

David Le

¹ Ampeu sheqhelo, O I ngulho, eno I lolo akeu kümtsü no Pa kimthe je sheqhelo!

² Ampeu sheqhelo, O I ngulho, eno Paw kükümghaqo kümsüma kevilo.

³ Pa no o xine kümtsü pevetsü eno o küsü kümtsü shipivi tsü,

⁴ Pa no aqo lono o küxü qhüchile tsü, Pa no iqemokeu kikimiye eno kimiyekini pesü o kütsükuqho shitsü,

⁵ Pa no akivi pesü o ghapiqi tsü tishikeu lono o lhothe küxü ye alhuqu toi mtotoilu peke.

⁶ Ampeu ye aghime lo akemi kümtsü ghenguno achipiu mikucho eno kuchou xakütha shi cheni.

⁷ Pa no Pa laghiqo Moses pelo ithilu peke, Israelmi pelo Pa kümla ithilu peke.

⁸ Ampeu ye küpükini eno kimiyekini, asheshi no amloide eno iqemokeu kikimiye no chhitoi.

⁹ Pa ye alhokuthu sakiyi chemo, Pa ye alholo amloide chemoe.

¹⁰ Pa ye ni xine qhemi lono ni ghimeqhi chemoe, momu ni kipimi qhemi lono tsüchile chemoe.

¹¹ Kughengu atsütsü no ayeghi nguno qhemghai ketoi, Pa gihu chekemi lau Paw iqemokeu kikimiye kije ani;

¹² Kipelau no kulolau sasü putosüpe aketoi, Pa no ni launo ni xine titohi lo ikhipe wuve tsü cheni.

¹³ Apu lakhi no pa tianuli lau kikimiye piye cheke toi, Ampeu no Pa gihu chekemi lau kimiyekini piye cheni.

¹⁴ Kughengu Pa no kishi ningu lhopüani keno ithi ani; ningu ye ayeghimkhu kepi Pa no kümsülu ani.

¹⁵ Timi ghenguno pa küxü ye asütsüni paphi ke, pa ye aluza lo axamunu lakhi toi azünihoi thuwu acheni;

¹⁶ tipa shou mülhü puku aye ti ye kühave cheni, eno tipa-a no khilemu ti ithi move cheni.

¹⁷ Ikemu Ampeu sükümsami lau Paw iqemokeu kikimiye ye shekhaha acheni, eno Pa chipiu mikucho ye atianuli lono atilimi kutolo acheni,

¹⁸ ti ye khunono no Paw puloshoqhi eno Pa zakütsü pape cheni keno pano ghenguno ke.

¹⁹ Ampeu no kungugha lo Pa kükalakhü kutovae, Pa kükaqha no kümtsü shou ayepe cheni.

²⁰ O nongu Paw kungumiqo, nongu akumtomi Pa tsa pape chekemi, Pa no pikeu tsa gholu chekeqo, Ampeu sheqhelo.

²¹ Ampeuw aqokitikhi kümtsü, Pa qemi khunono Pa pulou shicheni keno, Ampeu sheqhelo!

²² Pa yekipe qholo a-a kümtsü lo, Pa no pulhosü keqo kümtsü no Ampeu sheqhelo. Ampeu sheqhelo, O I ngulho!