LESHELE 102 - Sumi Naga CL (Re-edited) Bible (BSI)

I Launo O gi Küsüve Kevilo

Aghime lo Akemi Kighini

¹ I kighini ini tsülo, O Ampeu, I küqa O lau ighilu pelo!

² I ghime kitikhi tsala lo I launo O gi küsüve kevilo! O kini I lau kughopuwo tsülo I no O kuke tsala lo mtazü I khochile tsülo!

³ I küxü ye amchhi toi hauve ani, eno I ghi-anhü ye ayikiyiqibo miküiqü toi pitipüza ani.

⁴ I mlo ye asütsüni toi ikiqive no thizümüivae; ni ye achuqupu chu kümsümavae.

⁵ I no ighono mloqa kelauno I yiko no I ghi küzü luvae.

⁶ Ni ye yenguyike-a lo aqhaqho lakhi toivae pighiveke-a lo aqhaqho toi ani.

⁷ Ni ye zühumla no ani, ni ye aki kütsüqa lo tüghashoqhi thilishi ake toivae.

⁸ Atsala kupuju I ghümi no I cheqhi ani; I thaigha chekemi no ghusho kelo I je peitha ani.

⁹ Kughengu ni ye asho chu akeshi ayevu chu ani, eno I nhezü no I no yeakeu zü kite ghi sho ani,

¹⁰ Kughengu O loghu eno O xukighide ghenguno Nono ni ikhiqhe no peveke.

¹¹ I küxü ye avela yekükhü toivae; ni ye asütsüni thizümüive ke toivae.

¹² Ikemu O Ampeu, No ye alhokupuju kükalakhü lo iqa ani; tiqheli kümtsü lo No ye kümsülu acheni.

¹³ Nono ithughi no Zion kimiye nani; hi ye li shou kimiye kepu tüqhüdo ke; kihitha püakeu tüqhüdo ye hike.

¹⁴ Kughengu O qemi no li tuquqo kimiye cheni, eno li yeghimkhu kimiye cheni.

¹⁵ Shiyeqo no Ampeu je sümsa nani eno ayeghi lo kükami kümtsü no O juküvü sümsa nani.

¹⁶ Kughengu Ampeu no Zion shiqheke; Pa no Pa juküvü lono ipeghie;

¹⁷ Pa no thokha-thoghami kighini ikhilu tsü cheni eno panoqo kighini pevetsü chemoe.

¹⁸ Ighini keu tiqhelimi ghenguno hi yepe qhivelo, tishianguno hithiu tiqhelimi no Ampeu sheqhe nani:

¹⁹ ti ye Pa no Pa kimthe toghi lono jupiqi cheni; kungugha lono Ampeu no jupiqi acheni,

²⁰ akughu shi akemi mloküqa chilu tsüniye, pithive niye küghathave kemi kuqhophe tsüniye,

²¹ tishikeu lono panongu pelo Zion lo Ampeu je sheshu, eno Jerusalem lo Pa sheqhelu pelo,

²² kughou ashiaye eno kükaqhaqo no kümtsa hekütsü kumqo no Ampeu mlla keno tileno tishi nani.

²³ I lhothe lono Ampeu no I pelo kulhokughomi toi shivepe, Pa no I tsalaqo kughukhove tsü.

²⁴ I no pi, “O I Lhou, I küxü mta lono ni ikhi süwuve kevilo, No ye tiqheli kümtsü lo pülhapuju ache nani!”

²⁵ Nono khaghi no ayeghi boqha ghope qhike, eno kungugha ye O u no mla keu ke.

²⁶ Tipaqo ye hauve nani, ikemu No ye ache nani; tipaqo ye aphimini toi aqa shive nani. Nono tipaqo aphimini toi kilive nani, eno panoqo ye hauve nani.

²⁷ Ikemu No ye atho eno O mpe ye kishekha kühae.

²⁸ O qemi tianuli ye sükusho kivi shi xülu nani; pano tikughuko ye O zülo süshokulu anani.