LESHELE 101 - Sumi Naga CL (Re-edited) Bible (BSI)

Ni ye Akikhi lono Cheche Nani

Davidw Leshele

¹ I no iqemokeu kikimiye eno kuchou xakütha le pheni; O Ampeu, O lau I no ale pheni.

² I no tukutiye kühakeu laghi kümsü juni. O No ye kughono I lau ighini kea? Ni ye I kilo akikhi mlo xapusü cheche nani;

³ Kiukiumu ameküküha thime pesü I nhethe lo qhimo nani. Khunono ikiqive akeno pano kümla ye I no mithi ke; tino I sünhe luve pemo nani.

⁴ Chighichilai keu mlo ye I launo putosüve nani; ni ye kixikila kiumu ithimo nani.

⁵ Khuu no tuqhou no pa kisüghüu xishi jekuni keno I no kütsave nani. Khunono kumobei keu ju eno aqheküza mlo xapu ani keno ni ye kutuu mlae.

⁶ Ayeghi lo pükhükulumi shou I no kimiyeqhiyi ju nani, panongu ye I gholo xülu nani; khuu no tukutiye kühakeu laghi lo checheni keno I qelu nani.

⁷ Khukhumu pishikiqhi lono xüche kemi ye I kilo xülumo nani; khukhumu akimki tsa piche kemi ye I nhethe lo ngomla nani.

⁸ Ayeghi lo küsakügha shiche kemi kümtsü inaqhe atsütsü I no kütsave nani, Ampeuw mishighüna lono kixikila shiche kemi kümtsü hapheve nani.