LESHELE 10 - Sumi Naga CL (Re-edited) Bible (BSI)

Kushiye No ye Itshü Ania?

¹ O Ampeu, No ye kushiye putou ani kea? Kushiye No ye aküpüna tüqhüdo lo itshüuve ani kea?

² Kixikilami no aqheküza shi kumlhomi hakuqo cheni; pano no kuchughu akeu mqü lono kitimeve pelo.

³ Kixikilami no pa mlo lo kümsü akeu pesü qheza cheni, eno alakimnemi no Ampeu ghusho eno milive cheni.

⁴ Kixikilami ye pa qheküza lono Ampeu phu chemoe; pa kükümsü kümtsü lo, “Alhou ye kühae,” pike likhie.

⁵ Ala kümtsü lo pa ye ikoishelu cheni; Alhouw küghakütha ye pa launo shishe qhemghai ani; Pa no Pa ghümi kümtsü fuleve cheni.

⁶ Pa mlo lono picheni, “Ni ye ithamo nani; tiqheli kupuju lo ni ye aveküsa do sholumo nani.”

⁷ Pa kichi lo ghukusho, pishikiqhi eno qodaqhi keu no chhitoi; Pa milibo qholo pishikiqhi eno axine ani.

⁸ Pa no aphuqo lo ghüthepe ngokhe cheni; aküghütshü-a lono pa no pimihami ghiqhi cheni. Pa nhethi no akukuphu küha kemi tuqhou no jukuto cheni;

⁹ abongshuu toi pa no asüminipho lo itshüpe ghüthe cheni; kumlhomi tsüqü luveni ye pa no itshüpe ngo cheni; pa no kumlhomi tsüqüpe pa khame lono sünhesü luve cheni.

¹⁰ Akukuphu küha kemi munudaqhi, panongu ye pa kumto qholo ikiqive cheni.

¹¹ Pa mlo lono picheni, “Alhou ye kümsümavae, Pa ye Pa gi küsüvae, eno khilemu ithulu moae.”

¹² Ithulo, O Ampeu Alhou, O u süqhelo; aghime shi akemi kümsümave kevilo.

¹³ Kushiye küsaküghami ye Alhou qhive no pa mlo lono, “No ye I ghimemo nani,” ipi cheni kea?

¹⁴ Ikemu No ye ithulu ani, aveküsa eno aghime Nono kihi ani, tishikeu lono Nono O u lono ikhilu niye ke; akukuphu küha kemi no O lau pa ampi kulhuqhi tsü; Nono mighimi kukuphuu shi ighivae.

¹⁵ Kixikilami ngo küsaküghami u hechheve tsülo; paw kixikila kühave moke kutolo kichephe tsülo.

¹⁶ Ampeu ye alhokupuju eno alholo akükau ke; shiyeqo ye pa yeghi lono pühavae.

¹⁷ O Ampeu, Nono aghimemi kighini chilu tsü cheni; Nono pano mlo shikumto tsü, O kini kugho puwotsü nani,

¹⁸ mighimi eno qodaqhi akeqo lau kuchou xakütha tsü nani, tishikeu lono ayeghi lomi no shithüghüi kithemo nani.